मुख्यमंत्री श्री भूपेश बघेल के उपस्थिति म काली छत्तीसगढ़ के विशाल रंगोली ह बनाइस वर्ल्ड रिकार्ड

रायपुर, 18 दिसम्‍बर 2020। मुख्यमंत्री श्री भूपेश बघेल ह अपन मंत्रीमंडल के सदस्य मन के संग काली बिरसपत के राजधानी रायपुर के शंकर नगर स्थित बी.टी.आई.ग्राउण्ड म छत्तीसगढ़ राज्य महिला आयोग कोति ले राज्य सरकार के दू साल पूरा होए म तियार करे 9 हजार 100 वर्गफुट के विशाल रंगोली के अवलोकन करिन। मुख्यमंत्री श्री बघेल के उपस्थिति म छत्तीसगढ़ म बने ये 130 फीट लम्बा अऊ 70 फीट चौड़ा विशाल रंगोली ह वर्ल्ड रिकार्ड बनाइस अऊ ओला गोल्डन बुक ऑफ वर्ल्ड रिकार्ड म दर्ज करे गीस। गोल्डन बुक के आधिकारिक संवाददाता श्रीमती सोनल राजेश शर्मा ह समारोह म एखर अधिकारिक घोषणा करिन।
समारोह के शुरूआत म दू साल पूरा होए के खुशी म शंख, घंटी के अवाज के संग 100 महिला मन ह आरती के थारी अऊ दीया ले मुख्यमंत्री अऊ पूरा मंत्रीमंडल के सदस्य मन के भव्य स्वागत करिन। एखर बाद राज्य गीत ‘अरपा पैरी के धार…‘ ले छत्तीसगढ़ महतारी के पूजा करे गीस। मुख्यमंत्री श्री भूपेश बघेल ह राज्य महिला आयोग ल रंगोली के माध्यम ले वर्ल्ड रिकार्ड बनाए बर बधाई देवत कहिन के पाछू साल चुनाव अऊ ये साल कोरोना महामारी के बाद घलोक छत्तीसगढ़ महतारी के सेवा म हमन कोनो कमी नइ करेन। हर चेहरा म एखर खुशी अऊ प्रसन्नता हे। सबो मन अपन खुशी व्यक्त करे के अलग-अलग तरीका अपनाए हे। इही कड़ी म राज्य महिला आयोग कोति ले तियार रंगोली ह वर्ल्ड रिकार्ड बना लीस छत्तीसगढ़ महतारी ल अइसन सबो सजावव, संवारव अऊ खूब सेवा करव।