राज्य महिला आयोग कोति ले 9 हजार वर्गफुट के जबर रंगोली ले वर्ल्ड रिकॉर्ड बनाए के तैयारी

रायपुर, 16 दिसम्बर 2020। छत्तीसगढ़ राज्य महिला आयोग ह राज्य सरकार के दू साल पूरा होए म राजधानी रायपुर के शंकर नगर स्थित बी.टी.आई. ग्राउण्ड म 9 हजार 100 वर्गफुट के जबर रंगोली बनाके वर्ल्ड रिकॉर्ड बनाए के तैयारी करत हे। ये रंगोली करीबन 130 फीट लम्बा अऊ 70 फीट चौड़ा होही। राज्य महिला आयोग के अध्यक्ष डॉ. किरणमयी नायक ह आज रंगोली निर्माण के तैयारी मन के जायजा लीन अऊ जरूरी दिशा-निर्देश दीन। मुख्यमंत्री श्री भूपेश बघेल अऊ महिला अऊ बाल विकास मंत्री श्रीमती अनिला भेंड़िया 17 दिसम्बर के 4 बजे ये विशाल रंगोली के अवलोकन करहीं। आमजन 17 दिसम्बर के मंझनिया 2 बजे ले रंगोली देख सकहीं।
आयोग के अध्यक्ष श्रीमती किरणमयी नायक ह बताइस के छत्तीसगढ़ सरकार के दू साल बेमिसाल के थीम उपर रंगोली तियार करे जात हे। ये रंगोली के माध्यम ले मुख्यमंत्री भूपेश बघेल के नेतृत्व म होए छत्तीसगढ़ के विकास के रंग ल प्रदर्शित करे जाही। छत्तीसगढ़ म अब तक अतका बड़े रंगोली नइ बनाए गए हे। महिला आयोग कोति ले रंगोली ले वर्ल्ड रिकॉर्ड बनाए के तैयारी चलत हे। पहिली करीबन 7 हजार वर्गफुट म रंगोली बनाए के तैयारी करे जात रहिस फेर अब ये रंगोली करीबन 10 हजार वर्गफुट तक बने के अनुमान हे। उमन कहिन के रंगोली महिला मन के हिरदे ले जुड़े कला ये, ए खातिर महिला मन के कोति ले रंगोली के माध्यम ले छत्तीसगढ़ म दू साल म तेजी ले होए विकास कार्य मन के द्वारा मुख्यमंत्री श्री भूपेश बघेल ल धन्यवाद दे जाही। रंगोली ल रायपुर के स्थानीय कलाकार श्री विनोद पांडा ह तियार करत हे। ये रंगोली छत्तीसगढ़ के गौरव के चिनहा के रूप म तियार करे जात हे।