बलरामपुर: पीएम जनमन योजना ह बदल दीस श्री सरजू कोरवा के परिवार के जिंदगी

पक्का मकान, बुनियादी सुविधा अउ सामाजिक सुरक्षा योजना मन ले बढ़ीस जीवन के स्तर

बलरामपुर, प्रधानमंत्री जनमन योजना ह बिसेस पिछड़ी जनजाति मन के समकुल बिकास अउ ओमन ला बुनियादी सुविधा मन ले जोड़े के रद्दा म एक असरदार उदिम साबित होवत हे। ए योजना के माध्यम ले प्रदेस के दूर-दराज अउ जनजातीय इलाका म रहइया परिवार मन ला पक्का मकान देहे जात हे, जेकर से ओमन के जीवन म सुरक्षा, सम्‍मान अउ थिरता के नवा अधियाय जुड़त हे।
प्रदेस के अलग-अलग जिला म ए योजना के लाभ पा चुके परिवार अब माटी के अउ असुरक्षित घर मन ले निकलके पक्का मकान म सुरक्षित जिंदगी बितावत हें। मकान के संगे-संग ओमन ला सरकार के आन भलाई वाले योजना मन के घलो लाभ मिलत हे, जेकर से ओमन के सामाजिक अउ आर्थिक दशा म बड़ सुधार देखे जावत हे।
बलरामपुर जिला के ग्राम पंचायत चिलमा म रहइया श्री सरजू कोरवा ह प्रधानमंत्री जनमन आवास योजना के तहत पक्का मकान पाए ले अपन परिवार के संग सुरक्षित जिंदगी जीवत हे। श्री सरजू कोरवा ह पहिली अपन परिवार के संग माटी के छप्पर वाले कच्चा मकान म रहत रहिस। बरसात के दिन म सरलग पानी चुहत छांधी के सेती बड़ दुख-तकलीफ के सामना करे बर परत रहिस। पीएम जनमन योजना के तहत मकान मंजूर होए, समे म पइसा मिले अउ तकनीकी सही रद्दा मिले ले ओकर पक्का मकान ह तय समे म बनके तइयार हो गे।