प्रधानमंत्री सूर्य घर योजना ले विनिता साहू के घर म बगरिस अंजोर, बिजली बिल के चिंता होगे दूर

CHHATTISGARHI NEWS: रायपुर, छत्तीसगढ़ सरकार अऊ केंद्र सरकार के संघरा उदीम ले छत्तीसगढ़ म नागरिक मन के जिनगी ला सुगम बनाए बर सरलग काम करे जात हे। रायपुर जिला म चलित ‘सेवा संकल्प अभियान’ के तहत कई लोगन के जिनगी म सुग्घर बदलाव आवत हे, जेन म विनिता साहू के कहानी घलो बहुत प्रेरणादायक हे। पहिली विनिता साहू के परिवार ला हर महीना भारी-भरकम बिजली बिल के भुगतान करे म भारी दिक्कत अत रहिस। गर्मी के दिन म बिजली के जादा उपयोग होए के सेती घर के बजट गड़बड़ा जात रहिस अऊ आमदनी के एक बड़का हिस्सा बिजली बिल भरे म ही चल देत रहिस।
फेर जब ले शासन के ‘प्रधानमंत्री सूर्य घर मुफ्त बिजली योजना’ के जानकारी विनिता साहू ल मिलिस अऊ ओ ह अपन घर के छत म सौर ऊर्जा प्लांट लगवाइस, त ओखर जिनगी के पूरा तस्वीर बदल गे। ए सोलर पैनल लग जाए के सेती अब ओखर घर म बिजली के उत्पादन खुद होवत हे, जेकर सेती भारी-भरकम बिजली बिल के समस्या ले ओला पूरा मुक्ति मिल गे हे। अब ओ बिना कोनो फिकर के बिजली के उपयोग करत हे अऊ बिजली बिल शून्य या बहुत कम आवत हे।
ए योजना के सेती बांचे पइसा ल अब विनिता साहू अपन परिवार के दूसर जरूरी काम मन अऊ लइका मन के पढ़ई-लिखई म उपयोग करत हे। ए प्रकार के जनहितैषी योजना मन के जरिए ग्रामीण अऊ शहरी परिवार मन आत्मनिरभर बनत हें। सेवा संकल्प अभियान अऊ प्रधानमंत्री सूर्य घर योजना ह धरातल पर साबित कर देहे हे के कइसे हरित ऊर्जा के उपयोग गरीब परिवार मन के आर्थिक बोझ ला कम कर सकथे। विनिता साहू जइसे हजारों लोगन के जिनगी म आये ए बदलाव शासन के दूरदर्शी सोच के सुग्घर मिसाल हे।