नवा रायपुर स्थित संवाद भवन म रायपुर साहित्य उत्सव आयोजन समिति के बैठक आयोजित
पुरखौती मुक्तांगन म 23 ले 25 जनवरी तक आयोजित होही रायपुर साहित्य उत्सव
रायपुर, रायपुर साहित्य उत्सव 2026 के रूप म छत्तीसगढ़ के राजधानी म शब्द अउ विचार मन के एक ठन भव्य उत्सव आकार लेवत हे। ए प्रतिष्ठित आयोजन के तियारी मन ल लेके नवा रायपुर स्थित संवाद भवन म आयोजन समिति के एक ठन महत्वपूर्ण बैठक आयोजित करे गीस।
तय होईस आयोजन के रूपरेखा
ए मउका म आयोजन के रूपरेखा, अतिथि मन के सहभागिता, सांस्कृतिक प्रस्तुति, साहित्यिक सत्र अउ प्रचार-प्रसार के प्रगति के विस्तार ले समीक्षा करे गीस। मुख्यमंत्री के मीडिया सलाहकार श्री पंकज झा ह बैठक म कहिन् के रायपुर साहित्य उत्सव सिरिफ एक ठन कार्यक्रम नो हे, भलुक छत्तीसगढ़ के बौद्धिक, सांस्कृतिक अउ साहित्यिक पहिचान ल राष्ट्रीय मंच म स्थापित करे के मउका हरे। जानबा हे के नवा रायपुर अटल नगर के पुरखौती मुक्तांगन म 23 जनवरी ले 25 जनवरी 2026 तक तीन दिन के रायपुर साहित्य उत्सव के आयोजन करे जात हे।
देशभर के साहित्यकार अउ विचारक संघरहीं
रायपुर साहित्य उत्सव 2026 म देशभर के प्रतिष्ठित साहित्यकार, कवि, लेखक, पत्रकार, विचारक अउ युवा रचनाकार एक संग मंच साझा करहीं। ए बेरा म साहित्यिक गोठ-बात, किताब विमोचन, विचार-मंथन, सांस्कृतिक प्रस्तुति अउ कला-प्रदर्शन आयोजित करे जाही। ए मउका म किताब मेला के घलो आयोजन करे जाही, जेमा देश के नामी प्रकाशन समूह शामिल होही।
पुरखौती मुक्तांगन बनही साहित्य अउ संस्कृति के केंद्र
ए उत्सव पुरखौती मुक्तांगन, अटल नगर, नवा रायपुर म आयोजित करे जाही, जिहां छत्तीसगढ़ के समृद्ध सांस्कृतिक परंपरा अउ समकालीन साहित्यिक अभिव्यक्ति के सुंदर संगम देखे बर मिलही।
राष्ट्रीय पहिचान कोति बढ़त रायपुर साहित्य उत्सव
बैठक म ए बात स्पष्ट करे गीस के रायपुर साहित्य उत्सव 2026 ल देश के प्रमुख साहित्यिक आयोजन मन के श्रेणी म स्थापित करे के दिशा म ठोस प्रयास करे जात हे। ए उत्सव न केवल लेखक अउ पाठक मन ल जोड़ही, भलुक छत्तीसगढ़ के सांस्कृतिक छवि ल घलो राष्ट्रीय स्तर म अउ मजबूत करही। आयोजन ले जुड़े विस्तृत कार्यक्रम-सारणी अउ अतिथि मन के सूची जल्दीच सार्वजनिक करे जाही। बैठक म छत्तीसगढ़ साहित्य अकादमी के अध्यक्ष श्री शंशाक शर्मा, जिला पंचायत रायपुर के मुख्य कार्यपालन अधिकारी श्री विश्वरंजन, अपर संचालक जनसंपर्क श्री उमेश मिश्रा अउ श्री आलोक देव ह घलो रायपुर साहित्य उत्सव के सफल आयोजन ल लेके मार्गदर्शन दीन्।
