AI के दुनिया म राष्ट्रीय मंच म लहराइस छत्तीसगढ़ के परचम

इंडिया AI इम्पैक्ट बिल्डथॉन म रायपुर के अनुराग मानिक अउ आस्था मानिक ह पाइन पहिली जगा
मुख्यमंत्री श्री विष्णुदेव साय ह दीन बधाई अउ सुभकामना
तकनीक ला समाज के सरोकार ले जोड़े के प्रयास आज के डिजिटल जुग म उपयोगी अउ प्रेरणादायक – मुख्यमंत्री श्री साय

रायपुर, नई दिल्ली के भारत मंडपम म आयोजित प्रतिष्ठित “AI इम्पैक्ट समिट” म छत्तीसगढ़ के युवा मन ह अपन प्रतिभा के परचम राष्ट्रीय स्तर म लहराए हें। मुख्यमंत्री श्री विष्णुदेव साय ह रायपुर के होनहार भाई-बहिनी अनुराग मानिक अउ आस्था मानिक ला इंडिया AI इम्पैक्ट बिल्डथॉन प्रतियोगिता म पहिली जगा पाय बर अउ प्रदेश के मान बढ़ाय बर बधाई अउ सुभकामना देहे हें। उमन कहिन के 40,000 ले जादा प्रतिभागी मन के बीच तीन ठन कड़ा पड़ाव मन ला पार करके पहिली जगा पाना उंखर गजब के प्रतिभा, मेहनत अउ नवाचार (innovation) क्षमता के परमान आय।
मुख्यमंत्री श्री विष्णुदेव साय ह कहिन के ए सफलता छत्तीसगढ़ के जुवा मन के क्षमता, आतम-बिसवास अउ उभरत तकनीकी ताकत के चिनहारी आय। मुख्यमंत्री ह बताइन के प्रतियोगिता म उमन ‘कर्तव्य’ (Kartavya) AI ऐप पेस करिन, जेखर जम्मो कोति बहुत सराहना होइस। ए ऐप ह AI ले बने अवाज अउ असली अवाज के बीच के अंतर ला पहचानही, जेखर ले लोगन मन डिजिटल ठगी ले बच सकहीं। तकनीक ला समाज के भलाई ले जोड़े के ए प्रयास आज के डिजिटल जुग म बहुत काम के अउ प्रेरणा देवइया हे।
मुख्यमंत्री श्री साय ह कहिन के छत्तीसगढ़ के युवा मन अपन परंपरा अउ संसकृति ला सहेज के आधुनिक तकनीक अउ नवाचार के छेत्र म घलो आगू बढ़त हें। ए उपलब्धि प्रदेश म शिक्षा अउ नवाचार के दिसा म होवत विकास के एक बड़े परमान आय। उमन भरोसा जताइन के राज्य के युवा मन अइसने नवा ऊँचाई ला छुही अउ छत्तीसगढ़ ला देस अउ दुनिया म नवा पहिचान देवाहीं। मुख्यमंत्री ह कहिन के राज्य सरकार ह युवा मन ला तकनीक, नवाचार अउ स्टार्टअप के छेत्र म आगू बढ़ाय बर हरदम मदद अउ मउका देवत रहिही।