महतारी वंदन योजना ले शुरू करिस बकरी पालन

सारंगढ़, छत्तीसगढ़ सरकार के बड़े मान-गोण वाले महतारी वंदन योजना माईलोगन मन ल आर्थिक रूप ले मजबूत बनाय अउ ओमन ल आत्मनिर्भरता के डाहर आगू बढ़ाय म बड़े भूमिका निभावत हे। योजना के तहत मिले पइसा के सही उपयोग कर के माईलोगन मन अपन कमाय-धाय के साधन ल बढ़ावत हें। एही संकली म सारंगढ़ विकासखंड के ग्राम घोटला (छोटे) के रहइया अमारीन मांझी ह योजना ले मिले पइसा के उपयोग कर के एक ठन प्रेरणादायक उदाहरण पेस करे हे।
अमारीन मांझी ह महतारी वंदन योजना के तहत मिले वाला हर महीना के एक हजार रुपिया ल खरच करे के बदले म सरलग नौ महीना तक बचत करिस। ए तरी संचित होय 9 हजार रुपिया ले ओहा तीन ठन बकरी बिसाइस अउ बकरी पालन के काम शुरू करिस। अभी के समे म ओहा बकरी पालन ले अपन आमदनी बढ़ाय बर कोसिस करत हे अउ एखर ले होय वाला लाभ ल लेके भारी उत्साहित हे।
अमारीन मांझी ह बताथे के महतारी वंदन योजना ओखर बर बहुत काम के साबित होय हे। ए योजना ले ओला खुद के रोजगार शुरू करे के मउका मिलिस अउ ओखर आत्मविश्वास घलो बाढ़ीस हे। आज अमारीन मांझी ह गाँव के आन माईलोगन मन बर घलो एक ठन सीख बन गे हे। ओहा अपन अनुभव ल बतावत आन माईलोगन मन ल घलो सरकार के योजना मन के लाभ उठा के आत्मनिर्भर बने बर प्रेरित करत हे।