महतारी वंदन योजना ले आटा चक्की बिसा के शुरू करिस अपन खुद के उदिम

सारंगढ़-बिलाईगढ़, छत्तीसगढ़ सरकार के बड़े मान-गोन वाले महतारी वंदन योजना माईलोगन मन ल आर्थिक रूप ले मजबूत बनाय अउ ओमन ल आत्मनिर्भरता के रद्दा म आगू बढ़ाय बर एक ठन अच्चा माध्यम बनत हे। सारंगढ़-बिलाईगढ़ जिला के सारंगढ़ विकासखंड के अंतर्गत ग्राम भेड़वन के रहइया श्रीमती सीमा महंत ह ए योजना के लाभ उठा के आत्मनिर्भर बने के उड़ान भरत हे।
सीमा महंत ह महतारी वंदन योजना ले मिले पइसा ल जोर-बटोर के लगभग 13 हजार रुपिया म एक ठन आटा चक्की बिसाइस अउ ओला अपन खुद के रोजगार के रूप म शुरू करिस। ओहा गेहूँ पिसे के काम करथे, जेकर ले ओला हर महीना करीबन 5 हजार रुपिया तक के अलग ले आमदनी होवत हे। एखर ले ओखर परिवार के आर्थिक हालत ह पहिली ले अउ बने हो गे हे।
सीमा महंत ह बताथे के पहिली परिवार के कमई कम होय के सेती आर्थिक तंगी के सामना करे बर पडरत रहिस, फेर महतारी वंदन योजना ले मिले मदद ह ओला नवा मउका दिस। ओहा कहिस के ए योजना ले ओला खुद के गोड़ म खड़ा होय के सीख मिले हे। एखर बर ओहा मुख्यमंत्री श्री विष्णुदेव साय अउ छत्तीसगढ़ सरकार के आभार जताए हे।
सीमा महंत के ए कोसिस ह आन माईलोगन मन बर घलो एक ठन सीख बन गे हे। गाँव वाले मन के कहना हे के ओहा ए बात ल सच कर के देखा दीस के सरकार के योजना मन के सही उपयोग कर के माईलोगन मन अपन जिनगी म सुग्घर बदलाव ला सकथें अउ परिवार ल आर्थिक रूप ले मजबूत बनाय म बड़े भूमिका निभा सकथें।