खुद के उदिम के संग आन माईलोगन मन ल घलो देवत हे ट्रेनिंग
सारंगढ़, छत्तीसगढ़ सरकार के बड़े मान-गोण वाले महतारी वंदन योजना माईलोगन मन ल आर्थिक रूप ले मजबूत बनाय अउ ओमन ल आत्मनिर्भरता के डाहर आगू बढ़ाय म बड़े भूमिका निभावत हे। योजना ले मिले पइसा के सही उपयोग कर के माईलोगन मन अपन खुद के रोजगार के नवा मउका तैयार करत हें। एही संकली म सारंगढ़ विकासखंड के ग्राम भेड़वन के रहइया रजनी पटेल ह महतारी वंदन योजना के पइसा अउ अपन हुनर के उपयोग कर के गाँव म सिलाई सेंटर के सुरूवात करे हे।
रजनी पटेल ह योजना ले मिले आर्थिक मदद ले सिलाई मशीन बिसाइस अउ अपन गाँव म सिलाई सेंटर चलाय के काम सुरू करिस। ओहा खुद कपड़ा सिलाय के काम करत हे अउ ओखर संग गाँव के आन माईलोगन मन ल घलो सिलाई के ट्रेनिंग देवत हे। एखर ले ओला हर महीना बने आय (कमाई) होवत हे, जेकर ले ओहा अपन परिवार के पालन-पोसन म मदद करत हे।
रजनी पटेल ह बताथे के ए काम ले ओला आत्मनिर्भर बने के मउका मिलिस हे। सिलाई सेंटर के मयधम ले ओहा नइ केवल अपन गुजारा चलावत हे, बल्कि गाँव के आन माईलोगन मन ल घलो रोजगार ले जोड़े के कोसिस करत हे।
अंतर्राष्ट्रीय महिला दिवस के मउका म आयोजित जिला स्तरीय कार्यक्रम म रजनी पटेल ह कहिस के महतारी वंदन योजना माईलोगन मन बर बहुत काम के साबित होवत हे। ओहा ए योजना बर मुख्यमंत्री श्री विष्णुदेव साय के आभार जतइस अउ कहिस के ए पहल ले माईलोगन मन ल आगू बढ़े अउ आत्मनिर्भर बने के प्रेरणा मिलत हे।
