- लोक कलाकार मन के संग महाविद्यालय, स्कूल मन अऊ अंधमूक बधिर शाला मठपुरैना अउ हीरापुर के लइका मन ह घलोक हिस्सा लीन
रायपुर, रायपुर शहर विकासखंड स्तरीय युवा उत्सव के आयोजन काली रायपुर के मायाराम सुरजन शाला के सभागार म आयोजित होइस। ये आयोजन जिला प्रशासन के साथ-साथ स्मार्ट सिटी लिमिटेड, सेल अउ युवा कल्याण विभाग अऊ स्कुल शिक्षा विभाग कोति ले संघरा आयोजित करे गीस। महोत्सव म लोकनृत्य, लोकगीत, वक्तृत्व म कला अउ पारंम्परिक खेल, गेड़ी, भवरा, फुगड़ी के संगें-संग वादन के तहत तबला, हारमोनियम, बांसुरी के प्रतियोगिता होइस, जेमां लोक कलाकार मन के संग महाविद्यालय अऊ स्कूल मन अऊ अंध मूक बधिर शाला मठपुरैना, हीरापुर के लइका मन ह घलोक हिस्सा लीन।
ये प्रतियोगिता म 15-40 आयु वर्ग के अंतर्गत लोक गायन समूह म छाया कुशवाहा अउ साथी, वक्तृत्व कला म राजिद शेख, लोकगायन म लाकेश साहू, लोकनृत्य म जै संतराम गु्रप, वादन म राजकुमार साहू, बांसुरी म पवित्र सोनी, भौंरा म मनीष यादव, फुगड़ी म भारती नेताम पहिली रहिन।
40 साल ले जादा आयु वर्ग म वक्तृत्व कला म श्रीमती वंदना काले, बांसुरी म श्री गोविन्द प्रसाद वर्मा, हारमोनियम म श्री हरिशंकर पारधी, लोकगायन म रामेश्वर कश्यप, भौंरा म केदारनाथ जायसवाल पहिली रहिन।
