राजभवन म गूंजिस ‘अरपा पैरी के धार’

रायपुर, राजभवन के दरबार हॉल म आज बाल दिवस के अवसर म शासकीय दृष्टि अऊ श्रवण बाधित विद्यालय रायपुर के छात्रा मन ह आकर्षक अऊ मनोहारी सांस्कृतिक कार्यक्रम के प्रस्तुती दीन। विद्यालय के छात्रा सुश्री रूपवर्षा केरकेट्टा, सुश्री सुमन दीवान, सुश्री छाया कुशवाहा अऊ सुश्री जागेश्वरी सिन्हा के समूह ह छत्तीसगढ़ राज्य के राजगीत ‘अरपा पैरी के धार’ के भावमय प्रस्तुति दीन।
एखर बाद ए छात्रा मन ह ‘मोर रायपुर’ बर गाए गए स्वच्छता गीत घलोक गाइन। संगेच नरवा, गरूवा, घुरूवा बारी उपर आधारित गीत मन के घलोक प्रस्तुती दीन। उंखर प्रस्तुती के राज्यपाल सुश्री अनुसुईया उइके अऊ आन अतिथि मन ह जमके सराहना करिन। ये बेरा म दिव्यांग छात्र श्री अनमोल पटले ह राज्यपाल के स्केच ओ मन ल भेंट स्वरूप प्रदान करिस। एखरे संग जे. आर. दानी उच्चतर माध्यमिक विद्यालय के छात्रा सुश्री जिज्ञासा साहू अऊ सुश्री अनुष्का तिवारी ह पण्डित जवाहरलाल नेहरू के व्यक्तित्व उपर प्रकाश डालिस।