राजीव गांधी किसान न्याय योजना के तहत तीसर किश्त के पईसा बेरा म मिलीस देवारी के खुशी हो गे दुगुना

बिलासपुर, मुख्यमंत्री श्री भूपेश बघेल ह राज्य स्थापना दिवस एक नवम्बर के राज्य के किसान मन ल राजीव गांधी कियान न्याय योजना के तीसर किश्त के पईसा ऊंखर खाता मन म जमा करवा दीन। देवारी तिहार के बेरा म पईसा मिले ले किसान मन के परिवार म खुशी के महौल हे। किसान मन देवारी तिहार उछाह ले मनावत हें अऊ अपन घर परिवार के जरूरत घलोक पूरा करत हें।
बिलासपुर जिला के तखतपुर विकासखण्ड के ग्राम निरतू करहीपारा के किसान राजेन्द्र ओगरे ल तीसर किश्त के रूप म 3800 रूपिया मिलिस। पाछू दू किश्त म घलोक हर पइत अतकेच रकम ओ ल मिले रहिस। राजेन्द्र ह बताइस कि ओ ह 22 क्विंटल धान समर्थन मूल्य म बेचे रहिस। ओखर पास 1.5 एकड़ खेत हे। जेखर से परिवार के गुजारा नइ होवय। वो शहर जाके रोजी मजूरी घलोक करथे। तीसर किश्त के राशि ओखर खाता आए हे। जेखर से वो अपन दुनों लइका मन बर फटाका, नवा कुरथ अऊ मिठई बिसावत हे। ए पईसा के समय म मिले ले देवारी तिहार के खुशी दुगुना हो गए हे।
बिल्हा विकासखण्ड के ग्राम बहतराई के किसान घासीराम सूर्यवंशी के खाता म 6 हजार रूपिया आइस। ओखर तिर 2.5 एकड़ खेत हे। जेमां 83 कट्टी धान के पैदावार होए रहिस, जे ला ओ ह खरीदी केन्द्र म बेचे रहिस। दू किश्त के राशि पहिली मिल गए हे, अब तीसर किश्त मिले हे। घासीराम ह बताइस कि ये पइसा ले ओखर परिवार तिहार मनावत हे संगेच आ ह दूसर मन ले लेहे करजा ल घलोक चुकता करही। ए किसान मन ह मुख्यमंत्री श्री भूपेश बघेल के आभार व्यक्त करे हें। सही समय म ओ मन ल पइसा मिले ले ओ मन उछाह के संग देवारी मनावत हें।