कोविड-19 के प्रभाव ला नियंत्रित अउ रोकथाम बर समुचित कारवाही करे जाये – श्री राजीव गौबा
रायपुर, 03 जुलाई 2020। भारत सरकार के केबिनेट सचिव श्री राजीव गौबा हा आज दिल्ली ले देश के सबो राज्य के मुख्य सचिव मन ले कोरोना वायरस (कोविड-19) के कारण जन स्वास्थ्य म होये प्रभाव ला लेके विस्तार से चर्चा करिस । केबिनेट सचिव हा राज्यवार कोविड-19 के स्थिति के समीक्षा करिस । उमन कोरोना के प्रसार ला रोके बर समुचित कारवाही सुनिश्चित करे के निर्देश दे हावे । केबिनेट सचिव हा गृह मंत्रालय भारत सरकार द्वारा जारी नवा गाईडलाईन के पालन सुनिश्चित करे के निर्देश घलव दे हावे । छत्तीसगढ़ ले वीडियों कान्फ्रेंसिंग म भाग लेवत हे स्वास्थ्य विभाग के सचिव श्रीमती निकारिका बारिक सिंह हा केबिनेट सचिव ला राज्य के 6 जिला जिहा कोरोना के एक्टिव केश जादा हे उहा के जानकारी दिस । स्वास्थ्य सचिव हा केबिनेट सचिव ले राज्य म टेस्टिंग सुविधा बढ़ाये बर राज्य के प्राईवेट अस्पताल म ट्रूनाट टेस्टिंग मशीन के सुविधा उपलब्ध कराये के अनुरोध करिस । एमा केबिनेट सचिव श्री गौबा हा भारत शासन के डी जी आई सी एम.आर. ला त्वरित कारवाही करे के निर्देश दे हावे ।
वीडियों कान्फ्रेंसिंग म खाद्य अउ परिवहन विभाग के सचिव डॉ. कमलप्रीत सिंह घलव शामिल रिहिस । केबिनेट सचिव हा सबो राज्य म जादा से जादा कोरोना टेस्टिंग पर जोर दे हावे । अउ कोरोना पाजीटिव मरीज मन के जल्दी इलाज के व्यवस्था सुनिश्चित करे के निर्देश अधिकारी ला दे हावे । केबिनेट सचिव राज्य म आई सी यू बेड अउ वैंटिलेटर के सुविधा के घलव समीक्षा करिस । वीडियों कान्फ्रेंसिंग म भारत सरकार के स्वास्थ्य अउ परिवार कल्याण, गृह अउ अन्य विभाग के वरिष्ठ अधिकारी मन भाग लिस।
दुर्ग ले गुरतुर गोठ बर सोनू कुमार
