हर एक क्लब ल रचनात्मक कामं बर हर साल मिलही एक लाख रूपिया के अनुदान
युवा सम्मेलन म सामिल होइन मुख्यमंत्री
रायपुर, प्रदेश के मुख्यमंत्री श्री भूपेश बघेल के मुख्य आतिथ्य म राजीव युवा मितान क्लब छत्तीसगढ़ कोति ले आज पंडित दीनदयाल उपाध्याय ऑडिटोरियम रायपुर म पहिली युवा सम्मेलन के आयोजन करे गीस। ये बेरा म कई क्षेत्र मन म उपलब्धि हासिल करके समाज, राज्य अऊ देश के नाम रोशन करइया राज्य के युवा मन ल सम्मानित घलोक करे गीस।
मुख्यमंत्री ह कहिन कि पूर्व प्रधानमंत्री अऊ भारत रत्न स्वर्गीय श्री राजीव गांधी के सपना के मुताबिक छत्तीसगढ़ सरकार युवा मन ल संगठित करके अऊ ओ मन ल आगू बढ़ाए के दिशा म काम करत हे। हम युवा मन के माध्यम ले गढ़बो नवा छत्तीसगढ़ के सपना ल साकार करत हन। युवा शक्ति संगठित होवय, ओ मन ल शिक्षा अऊ रोजगार के बेहतर अवसर मिलय, ये हमर प्राथमिकता मन म सामिल हे।
उमन कहिन राज्य के युवा मन ल रचनात्मक काम ले जोड़े अऊ उमन ल नेतृत्व क्षमता अऊ सामाजिक दायित्व खातिर सजग बनाए के उद्देश्य ले राजीव युवा मितान क्लब योजना के शुरूआत के गए हे। एखर तहत ग्राम पंचायत अऊ नगरी निकाय मन के वार्ड मन म 13 हजार 269 राजीव युवा मितान क्लब गठित करे जाही। ये क्लब म 15 ले 40 साल आयु के युवा मन सामिल होही, जेन सामाजिक अऊ रचनात्मक गतिविधि मन के संगें-संग शासकीय योजना अऊ कार्यक्रम मन के क्रियान्वयन म अपन भागीदारी निभाहीं। मुख्यमंत्री ह कहिन कि पूर्व प्रधानमंत्री स्वर्गीय श्री राजीव गांधी ह देश म सूचना क्रांति के सूत्रपात करिन अऊ कम्प्यूटर ल बढ़ावा देहे म अहम भूमिका निभाईन। युवा मन ल मताधिकार, त्रि-स्तरीय पंचायती राज व्यवस्था के माध्यम ले आगू बढ़े के विशेष अवसर प्रदान करे गीस। राजीव गांधी किसान न्याय योजना अऊ गोधन न्याय योजना हमर सरकार के महत्वपूर्ण योजना हे। अब हम गोबर ले बिजली उत्पादन करइया हन।
