रायपुर, 05 मार्च 2024। अयोध्या म प्रभु श्रीरामलला के मंदिर निर्माण ल लेके पाछू 500 बछर के संघर्ष अऊ घटना के शानदार प्रस्तुति कल राजिम कुंभ म देहे गीस। ए ऑडियो-विजुअल संगीतमय प्रस्तुति देखके श्रद्धालु मन के आंखी भींज गे।
राजिम कुंभ के मुख्य मंच ले ऑडियो-विजुअल के माध्यम ले भोपाल ले आए श्री मोहित शेवानी ह प्रभु श्रीराम के महिमा अऊ रामायण के कथा के अद्भुत प्रस्तुति दीन। श्रद्धालु मन ए कहानी मन ल सुनके भावुक हो उठीन। उमन उज्जैन के राजा विक्रमादित्य ले श्रीराम लला के जुड़े कथा मन के सजीव वरनन करिन।
मंच म कार्यक्रम के अगला कड़ी म हिलेन्द्र ठाकुर बिलासपुर के टीम ह लोककला मंच म छत्तीसगढ़ी विवाह गीत ले लेके गौरी-गौरा गीत मन के प्रस्तुति दीन। रायपुर के घनश्याम साहू के टीम ह लोकमंच म बारहमासी गीत के प्रस्तुति देके एक पइत फेर होली के सुरता देवा दीन। छत्तीसगढ़ी म फाग गीत के प्रस्तुति ह दर्शक मन ल झूमे बर मजबूर कर देथे। दीपाली पांडे ह कत्थक नृत्य के शानदार प्रस्तुति दीस।
श्रीरामलला मंदिर निर्माण के 500 साल के संघर्ष के प्रस्तुति देखके श्रद्धालु मन होइन भावुक
