- देवालय दर्शन अऊ घाट मन म असनांद के सिलसिला शुरू
- राजिम माघी पुन्नी मेला आज ले चालू
रायपुर, छत्तीसगढ़ के प्रयाग राज के रूप म प्रसिद्ध राजिम म माघी पुन्नी मेला आज ले चालू हो गए हे। श्रद्धालुमन के भिनसरहा ले ही देवालय दर्शन अऊ घाट मन म असनांद के सिलसिला शुरू हो गए हे। मान्यता के मुताअिक माघ पुन्नी के बेरा म पुन्नी असनांद के विशेष महत्व हे, ते पाए के सोढुर, पैरी अऊ महानदी के त्रिवेणी संगम के असनांद करे बड़ संख्या म श्रद्धालु पहुंचत हें।
राजिम के मेला स्थल म राज्य शासन ह विशेष इंतजाम करे हे। संगम स्थल म बनाय गए एनीकट म पानी के व्यवस्था संग संत निवास, आवागमन के सुविधा, पूरा मेला क्षेत्र के साफ सफाई, सांस्कृतिक कार्यक्रम आदि के व्यवस्था करे गए। 14 दिन तक चलइया ये मेला म इहां रोजेच संत मन के आशीष वचन घलोक मिलही। पूरा मेला स्थल म कानून व्यवस्था बर पुलिस जवान तैनात करे गए हे। श्रद्धालु मन के सुविधा बर विशेष बस के संचालन घलोक करे जात हे। मेला स्थल म व्यवस्थित रूप ले दुकान बर जगा आबंटित करे गए हे। मेला स्थल म पेयजल, शौचालय अऊ पार्किंग के घलोक व्यवस्था करे गए हे। मुख्य मंदिर तीर भव्य अऊ आकर्षक मंच बनाय गए हे, जिहां स्थानीय लोककलाकार मन सांस्कृतिक कार्यक्रम प्रस्तुत करहीं। मंदिर परिसर संग पूरा मेला क्षेत्र के आकर्षक सजावट करे गए हे। मुख्यमंत्री के घोषणा के मुताबिक माघी पुन्नी मेला के बेरा म राजिम अऊ आसपास के क्षेत्र मन म मदिरा के विक्रय प्रतिबंधित कर दे गए हे।