रायपुर, 08 फरवरी 2020। देश दुनिया म अपन अलग पहिचान बनइया राजिम माघी पुन्नी मेला 9 फरवरी ले शुरू होवत हे। मेला के तैयारी आखरी चरण म हे। धर्मस्व मंत्री श्री ताम्रध्वज साहू सरलग मेला क्षेत्र के भ्रमण करके तैयारी मन के जायजा लेवत हे। उमन मौसम ल ध्यान म रखत वाटर प्रुफ पंडाल लगाय के हुकुम दिए हें।
राजिम माघी पुन्नी मेला के तहत त्रिवेणी संगम म रेती के अस्थायी सड़क मन के निर्माण अउ राजिम ल आन शहर अउ गांव मन ले जोड़इया सड़क मन के मरम्मत के काम घलव अब पूरा होवइया हे। जल संसाधन विभाग कोति ले विशेष पर्व स्नान बर कुण्ड निर्माण अउ नदी म पानी छोड़े के तैयारी करे गए हे। लोक स्वास्थ्य यांत्रिकी विभाग कोति ले मेला क्षेत्र म पेयजल के व्यवस्था अउ अस्थायी शौचालय बनाय गए हे।
धर्मस्व मंत्री ह जांच के समय स्वास्थ्य विभाग ल मेला क्षेत्र म स्वास्थ्य सुविधा मन के व्यवस्था अउ डॉक्टर मन के टीम हमेशा मौजूद रखे के हुकुम देहे हें। खाद्य विभाग ल 50 दाल-भात सेंटर संचालित करे, वन मण्डलाधिकारी ल बांस-बल्ली देहे, परिवहन विभाग ल रायपुर, धमतरी, गरियाबंद, महासमुन्द जिला मन के सबो रूट म सरलग अऊ बहुत मात्रा म बस के संचालन करे, विद्युत विभाग ल प्रकाश के समुचित व्यवस्था करे अउ पुलिस विभाग ल मेला क्षेत्र म सुरक्षा व्यवस्था के संगेच बस मन म होमगार्ड के तैनाती करे के जिम्मेदारी दे गए हे। मेला क्षेत्र म कपड़ा अउ कागज के थैली मन के उपयोग ल प्रोत्साहित करे ल कहे गए हे।
राजिम माघी पुन्नी मेला म छत्तीसगढ़ी सांस्कृतिक अउ लोक परम्परा उपर आधारित कार्यक्रम के प्रमुखता रइही। राज्य के प्रमुख लोक कलाकार मन कोति ले इहां प्रस्तुति दे जाही। मुख्य मंच म रोजे रतिहा 8 बजे ले 10 बजे तक रंगारंग प्रस्तुति होही। स्थानीय कलाकार मन ल घलोक मौका दे जाही। स्थानीय कलाकार मन के कार्यक्रम संझा 5.30 बजे ले रात 8 बजे तक होही। मुख्य मंच के अलावा नीचे म घलोक मंच बनाए गए हे, जिहां मुख्य रूप ले छत्तीसगढ़ी संस्कृति अऊ रीति रिवाज मन ले परिपूर्ण कार्यक्रम प्रस्तुत करे जाही। मेला म नाचा, पंडवानी, रामधुनी, सुआ नृत्य, भोजली, डंडा नृत्य, राउत नाचा, गेड़ी आकर्षण के केन्द्र होही। मेला म शासन के जनकल्याणकारी योजना मन ल घलोक प्रदर्शित करे जाही। विभागीय प्रदर्शनी म कृषि, उद्यानिकी, महिला अउ बाल विकास, स्वास्थ्य, वन, ग्रामोद्योग, हस्तशिल्प, आदिवासी विकास, पर्यटन, जनसंपर्क अउ जिला पंचायत के स्टाल लगही।
