कोविड-19 के चलते मेला म ये पईत नइ होवय शासकीय कार्यक्रम
रायपुर, 11 फरवरी 2021। राजिम म हर साल आयोजित होवईया माघी पुन्नी मेला ये साल 27 फरवरी ले 11 मार्च तक होही। धार्मिक न्यास अउ धर्मस्व मंत्री श्री ताम्रध्वज साहू ह आज अपन रायपुर निवास कार्यालय म विभागीय अधिकारी मन अऊ मेला समिति के पदाधिकारी मन के बैठक लेके तैयारी मन के समीक्षा करिन। उमन कहिन कि भारत सरकार के कोरोना गाइड लाइन ल देखत मेला म कोनो प्रकार के शासकीय कार्यक्रम नइ होवय, फेर पहिली साल जइसे श्रद्धालु मन के सुविधा बर सबो जरूरी व्यवस्था करे जाही। उमन कहिन कि ओ मन मेला स्थल म जाके केन्द्रीय मेला समिति के बैठक म तीनों जिला गरियाबंद, रायपुर अऊ धमतरी के कलेक्टर मन अऊ पुलिस अधीक्षक मन ल श्रद्धालु मन के सुरक्षा, सहूलियत अऊ यातायात के व्यवस्था ठउका करे के हुकुम देहे गए हे। उमन कहिन कि मनखे मन के सुविधा बर पहिली जइसे सड़क, शौचालय, बिजली, पानी, स्वास्थ्य, सफाई आदि के व्यवस्था केरे अऊ कोरोना संक्रमण ले बचे बर मेला म अवईया श्रद्धालु मन ले सावधानी बरते के आग्रह करे जाए। राजिम माघी पुन्नी मेला के आयोजन 27 फरवरी ले 11 मार्च तक होही। ये दौरान 27 फरवरी, 6 मार्च अऊ 11 मार्च के तीन स्नान परब घलव होही।
