मुख्यमंत्री ह स्वर्गीय श्री राजीव गांधी के जयंती म उन मन ल करीस नमन
रायपुर, 19 अगस्त 2023
मुख्यमंत्री दाऊ भूपेश बघेल ह देश के पूर्व प्रधानमंत्री भारत रत्न स्वर्गीय श्री राजीव गांधी के 20 अगस्त के जयंती म उन मन नमन करीन हावय। श्री राजीव गांधी ल सुरता करत दाऊ बघेल ह कहिन हावय कि राजीव जी ह 21 वीं सदी के आधुनिक भारत के नेंव रखीस। देश म कम्प्यूटर क्रांति अउ सूचना क्रांति लाने के श्रेय राजीव जी ल जाथे। कम्प्यूटर के जरिया शासकीय काम-काज म पारदर्शिता आईस अउ ई-प्रशासन के माध्यम ले आमजन तक शासकीय योजना मन के पहुंच सुनिश्चित होइस। वास्तव म राजीव जी आधुनिक भारत के स्वप्नदृष्टा रिहिसे।
मुख्यमंत्री ह कहिन कि श्री राजीव गांधी ह भारत के सबले युवा प्रधानमंत्री के रूप म देश के बागडोर संभालीन। उन मन देश के लोकतांत्रिक प्रक्रिया में युवा मन के भागीदारी सुनिश्चित करे खातिर युवा मन ल 18 बछर म मतदान के अधिकार देवाइन। उन मन देश म त्रिस्तरीय पंचायती राज संस्था अउ नगरीय निकाय मन ल अधिकार संपन्न बनाए बर तको बड़का बूता करीन। राज्य सरकार कोति ले ‘‘राजीव युवा मितान क्लब‘‘ के जरिया ग्रामीण अउ शहरी क्षेत्र मन के युवा मन ल रचनात्मक सांस्कृतिक गतिविधि खेल-कूद आदि मन ले जोड़े जावत हावय।
मुख्यमंत्री कहिन कि स्वर्गीय राजीव गांधी के दृष्टिकोण रिहिस कि ‘भारत म गरीबी उन्मूलन अउ आत्मनिर्भर भारत‘ निर्माण के लक्ष्य के प्राप्ति किसान मन के आर्थिक दशा म सुधार के बिना संभव नइहे। उन्कर बताए रद्दा म चलत राज्य सरकार ह गरीबन, किसान, आदिवासी मन के संगे संग सबो वर्गों के लोगन मन बर अबड़ अकन कल्याणकारी कार्यक्रम अउ योजना शुरु करे हावय। किसान मन ल उन्कर उपज के वाजिब मूल्य देवाए बर ‘राजीव गांधी किसान न्याय योजना’ शुरु करे गे हावय। ये योजना के माध्यम ले राज्य के 24 लाख ले जादा किसान मन ले 20,103 करोड़ रूपिया इनपुट सब्सिडी के रूप म दिए गे हावयं। संग म राज्य के ग्रामीण अंचल के भूमिहीन कृषि मजदूर मन ल आर्थिक मदद देहे बर ‘‘राजीव गांधी भूमिहीन कृषि मजदूर न्याय योजना‘‘ शुरू करे गे हावय। ये योजना के तहत ग्रामीण अंचल के अइसन परिवार मन ल 7000 रूपिया हरे बछर दिए जावत हावयं, जिन्कर तीरन खेती के जमीन नइ हे अउ वोमन मनरेगा, कृषि मजदूरी या पौनी-पसारी ले जुरे हावयं। राज्य सरकार ह किसान मन के बेहतरी बर बछर पुट समर्थन मूल्य म धान के खरीदी, कर्जामाफी, सिंचाई कर के माफी जइसन कदम उठाए हावय।
दाऊ बघेल ह कहिन कि राज्य सरकार राजीव जी के समावेशी विकास के सपना ल पूरा करे के दिशा म आगू बाढ़त हावय। राजीव जी ह भारत के प्रगति के जोन सपना देखे रिहिन, वोला पूरा करे बर सच्चा प्रयास ही उन ल वास्तविक श्रद्धांजलि होही।
