रायपुर, मुख्यमंत्री श्री भूपेश बघेल के सोंच के मुताबिक राज्य के अनुसूचित जाति, अन्य पिछड़ा वर्ग अऊ ईडब्ल्यूएस वर्ग के पढ़ईया लईका मन बर स्वर्गीय राजीव गांधी बाल भविष्य सुरक्षा प्रयास आवासीय विद्यालय योजना के तहत अवईया वित्तीय सत्र 2023-24 म चार नवा प्रयास आवासीय विद्यालय चालू करे जाही। प्रदेश के अनुसूचित जाति वर्ग के बालक मन बर 500 सीटर, बालिका मन बर 500 सीटर अऊ अन्य पिछड़ा वर्ग अऊ ईडब्ल्यूएस वर्ग के छात्र मन बर 500 सीटर अऊ ए वर्ग के छात्रा मन बर 500 सीटर, ये प्रकार ले कुल 2000 सीटर क्षमता के 4 आवासीय विद्यालय चालू करे जाही।
हरेक आवासीय विद्यालय म कक्षा 9वी म 125-125 छात्र-छात्रा मन ल प्रवेश दे जाही। ए 4 प्रयास आवासीय विद्यालय मन के चालू हो जाय ले कुल 2000 छात्र-छात्रा मन ल निःशुल्क आवासीय शिक्षा अऊ कोचिंग के लाभ मिलही। आदिवासी विकास विभाग के अधिकारी मन ह बताइन कि ए आवासीय विद्यालय मन म प्रवेशित छात्र-छात्रा मन ल 9वीं ले बारहवीं तक के अध्यापन के निःशुल्क व्यवस्था होही। संगेच पढ़ईया लईका मन ल कई ठन प्रतियोगी परीक्षा जइसे पीएमटी पीईटी, एनएसटीई, जेईई मेन/एडवांस, एम्स, नीट, सीए/सीएस, क्लेट, एनडीए आदि के घलोक निःशुल्क कोचिंग प्रतिष्ठित कोचिंग संस्थान मन कोति ले उपलब्ध कराए जाही। उमन बताइन कि प्रदेश के चार नवा प्रयास विद्यालय मन के चालू हो जाय ले संबंधित संवर्ग के कुल 2000 छात्र-छात्रा मन ल स्वर्गीय राजीव गांधी बाल भविष्य सुरक्षा प्रयास आवासीय विद्यालय योजना के लाभ मिलही।
राजीव गांधी बाल भविष्य सुरक्षा प्रयास आवासीय विद्यालय योजना म सुरू होही 4 नवा प्रयास आवासीय विद्यालय
