- दिल्ली ले श्रीमती सोनिया गांधी अऊ श्री राहुल गांधी वीडियो कांफ्रेसिंग के संग शुभारंभ कार्यक्रम म होहीं सामिल
- प्रदेश के किसान मन ल मिलही बड़का राहत: 5700 करोड़ रूपिया के राशि डीबीटी के माध्यम ले चार किश्त म जाही किसान मन के खाता म
- प्रदेश म धान, मक्का अऊ गन्ना (रबी) के 19 लाख किसान मन ल मिलही फायदा
- पहिली किश्त के रूप म 1500 करोड़ रूपिया किसान मन के खाता म होही आनलाईन अंतरण
- किसान मन ल खेती किसानी ले जोड़े देश म अपन किसिम के पहिली योजना
- श्री बघेल ह योजना करिन शुभारंभ कार्यक्रम के तैयारी के करिन समीक्षा
रायपुर, 20 मई 2020। पूर्व प्रधानमंत्री भारत रत्न स्वर्गीय श्री राजीव गांधी के शहादत दिवस 21 मई के दिन छत्तीसगढ़ सरकार किसान मन बर न्याय योजना शुरू करत हे। दिल्ली ले श्रीमती सोनिया गांधी अऊ श्री राहुल गांधी वीडियो कांफ्रेसिंग के संग ये योजना के शुभारंभ कार्यक्रम म सामिल होहीं। मुख्यमंत्री श्री भूपेश बघेल अऊ मंत्रीमण्डल के सदस्यगण मुख्यमंत्री निवास कार्यालय म आयोजित कार्यक्रम म काली मंझनिया 12 बजे स्वर्गीय श्री राजीव गांधी के फोटू म पुष्पांजलि अर्पित करहीं। एखर पाछू किसान मन ल जउन राशि देहे जाही वो 5700 करोड़ रूपिया के राशि म ले पहिली किश्त के रूप म 1500 करोड़ रूपिया के राशि किसान मन के खाता म आनलाईन अंतरण करे जाही। कार्यक्रम म जिला मन ले सांसद, विधायक, आन जनप्रतिनिधि, किसान अऊ कई ठन योजना मन के हितग्राही घलोक वीडियो कांफ्रेसिंग ले जुड़हीं।
मुख्यमंत्री श्री भूपेश बघेल आज इहां अपन निवास कार्यालय म योजना के शुभारंभ बर करे जात तैयारी मन के वरिष्ठ अधिकारी मन के संग समीक्षा घलोक करिन।
जानबा हे के छत्तीसगढ़ देश म पहिली अइसे राज्य हे जऊन किसान मन ल सीधा बैंक खाता म राशि ट्रांसफर करके 5700 करोड़ रूपिया के राहत प्रदान करत हे। कोरोना संकट के काल म किसान मन ल छत्तीसगढ़ सरकार राजीव गांधी किसान न्याय योजना के माध्यम ले बड़का राहत प्रदान करइया हे। ये योजना के उद्देश्य फसल उत्पादन ल प्रोत्साहित करना अऊ किसान मन ल उंखर उपज के सही दाम देवाना हे।
