छत्तीसगढ़ ल 3 फरवरी के मिलही चार ऐतिहासिक सौगात

रायपुर, लोकसभा सांसद श्री राहुल गांधी 3 फरवरी के राजधानी रायपुर के साईंस कॉलेज मैदान म छत्तीसगढ़ शासन के महत्वाकांक्षी ‘राजीव गांधी ग्रामीण भूमिहीन कृषि मजदूर न्याय योजना’ अऊ ‘राजीव युवा मितान क्लब योजना’ के शुभारंभ करहीं संगेच महात्मा गांधी के सुरता मन ल संजोए बर नवा रायपुर म स्थापित होवइया ‘सेवाग्राम’ अऊ ‘छत्तीसगढ़ अमर जवान ज्योति’ के भूमिपूजन करहीं।
मुख्यमंत्री श्री भूपेश बघेल के घोषणा के मुताबिक देश म पहली पइत छत्तीसगढ़ म भूमिहीन ग्रामीण कृषि मजदूर मन बर लागू करे जात ‘राजीव गांधी ग्रामीण भूमिहीन कृषि मजदूर न्याय योजना’ के तहत ग्रामीण भूमिहीन कृषि मजदूर परिवार ल तीन किश्त म हर साल 6 हजार रुपए के आर्थिक मदद देहे जाही। श्री राहुल गांधी योजना के शुभारंभ के अवसर म ये योजना के 3 लाख 55 हजार हितग्राही मन के खाता म पहली किश्त के रुप म 2 हजार रुपए के राशि जारी करहीं। ये योजना के बजट म 200 करोड़ रुपए के प्रावधान करे गए हे। ग्रामीण भूमिहीन कृषि मजदूर परिवार के अंतर्गत चरवाहा, बढ़ई, लोहार, मोची, नाई, धोबी अऊ पुरोहित जइसे पौनी-पसारी व्यवस्था ले जुड़े परिवार, वनोपज संग्राहक अऊ समय-समय म संघरे आन वर्ग घलोक पात्र होहीं। योजना के हितग्राही मन म बड़का तबका अन्‍य पिछड़ा वर्ग म आथे। राज्य सरकार अन्‍य वर्ग मन ल घलोक पात्रतानुसार योजना म सामिल कर सकही। ये योजना म अइसन मनखे मन ल पात्र बनाए गए हे, जिंकर तिर आवासीय जमीन तो हे, फेर कृषि जमीन नइ हे।