मुख्यमंत्री श्री भूपेश बघेल ह किसान, भूमिहीन मजदूर, पशुपालक अऊ समूह के महिला मन ल दीन 1804.50 करोड़ रूपिया के सौगात

रायपुर, मुख्यमंत्री श्री भूपेश बघेल ह आज पूर्व प्रधानमंत्री भारत रत्न स्वर्गीय श्री राजीव गांधी के पुण्यतिथि म अपन निवास कार्यालय म आयोजित कार्यक्रम म छत्तीसगढ़ राज्य के 26 लाख 68 हजार ले जादा किसान, भूमिहीन कृषि मजदूर, पशुपालक अउ समूह ले जुड़े महिला मन ल 1804 करोड़ 50 लाख रूपिया के राशि सीधा ऊंखर बैंक खाता म अंतरित करिन। मुख्यमंत्री ह राज्य के किसान, भूमिहीन कृषि मजदूर, पशुपालक अऊ महिला समूह मन ल बधाई अऊ शुभकामना देवत कहिन कि छत्तीसगढ़ देश के पहला राज्य हे, जेन ह न्याय योजना के माध्यम ले हरेक मनखे के सामाजिक अऊ आर्थिक अधिकार ल सुनिश्चित करे हे।
मुख्यमंत्री ह ये बेरा म राजीव गांधी ग्रामीण भूमिहीन कृषि मजदूर न्याय योजना के अंतर्गत 3 लाख 55 हजार 402 हितग्राही मन ल साल 2022-23 के पहिली किश्त के रूप म 71 करोड़ 8 लाख 4 हजार रूपिया के राशि जारी करिन अऊ कहिन कि योजना के तहत अब वार्षिक सहायता राशि 6 हजार रूपिया ले बढ़ाके 7 हजार रूपिया कर देहे गए हे। उमन गोधन न्याय योजना के अंतर्गत कुल 13 करोड़ 31 लाख रूपिया के अंतरण गोबर विक्रेता, गौठान समिति अऊ महिला स्व-सहायता समूह मन ल करिन। ये मां ले 11 करोड़ 14 लाख रूपिया गौठान समिति अऊ महिला समूह मन ल अऊ 2 करोड़ 17 लाख रूपिया के भुगतान संग्राहक मन ल अंतरित करे गीस। अब तक स्व-सहायता समूह मन अऊ गौठान समिति मन ल कुल 110 करोड़ रूपिया के लाभांश अउ भुगतान देहे जा चुके हे। अइसनहे गोबर खरीदी बर हितग्राही मन ल कुल 140.71 करोड़ रूपिया के राशि जारी करइया हे।
ये कार्यक्रम म वीडियो कॉन्फ्रेसिंग के माध्यम ले जुड़े कृषि अउ जल संसाधन मंत्री श्री रविन्द्र चौबे, राजस्व मंत्री श्री जयसिंह अग्रवाल ह घलोक सम्बोधित करिन। उमन कहिन कि मुख्यमंत्री श्री भूपेश बघेल के नेतृत्व म छत्तीसगढ़ सरकार समाज के सबो वर्ग के उत्थान बर काम करत हे। उमन कहिन कि सरकार के जनहितैषी नीति मन के चलते सबो वर्ग म खुशहाली अऊ बदलाव दिखाई देवत हे। कृषि मंत्री ह कहिन कि छत्तीसगढ़ सरकार ह बीते तीन साल म करीबन एक लाख करोड़ रूपिया किसान, भूमिहीन मजदूर, वनोपज संग्राहक अऊ गोधन न्याय योजना के हितग्राही मन के खाता म डाले हे।