सियान मन के आशीर्वाद ले जन सेवा करे के मिलथे शक्ति: श्रीमती राजवाड़े
रायपुर, 15 जुलाई 2024, समाज कल्याण मंत्री श्रीमती लक्ष्मी राजवाड़े ह माना स्थित वृद्धाश्रम के निरीक्षण करे रहिन अऊ उहां रहइया सियान मन से बात-चीत करे रहिन। वो समें कुछ सियान मन ह राजीव लोचन के दर्शन के इच्छा जताये रहिन, उंखर ये इच्छा जल्दी पूरा हो गीस, ते पाए के सियान मन अड़बड़ खुश हें।
मंत्री श्रीमती राजवाड़े ह सियान मन के इच्छा के मान रखत ओ मन ल खुदे राजीव लोचन दर्शन कराए के बारे म सोचिन अऊ इतवार के वृद्धाश्रम म रहइया सियान मन ल घटारानी अऊ राजीव लोचन मंदिर राजिम के दर्शन कराए खुदे अपन संग लेके गीन। ए बेरा म श्रीमती राजवाड़े ह सियान मन के संग भजन-कीर्तन करिन अऊ संगेच स्वाल्पाहार के घलोक आनंद लीन। घटारानी अऊ भगवान राजीव लोचन के दर्शन ले वृद्धाश्रम के सियान मन के हृदय के प्रसन्नता ऊंखर चेहरा ले झलकत रहिस।
मंत्री श्रीमती लक्ष्मी राजवाड़े ह कहिन के उंखर ले मिले आशीर्वाद ह जन सेवा करे बर मोला अऊ शक्ति देही। ए बेरा म राजिम विधायक श्री रोहित साहू, अभनपुर विधायक श्री इंद्र कुमार साहू सामिल रहिन।
जानबा हे के छत्तीसगढ़ म मुख्यमंत्री श्री विष्णु देव साय के नेतृत्व म सरकार बहुत अकन जनकल्याणकारी योजना लागू करत हे। राज्य के निराश्रित मन बर सरकार सहारा बनत हे। एखर बर समाज कल्याण विभाग के माध्यम ले राहत पहुंचाए के काम करे जात हे।
