- युवा मन म नेतृत्व क्षमता अऊ कौशल विकास के गतिविधि होही संचालित
- मुख्यमंत्री के अध्यक्षता म गठित करे जाही राज्य स्तरीय समिति
रायपुर, 30 जनवरी 2020। मुख्यमंत्री श्री भूपेश बघेल के अध्यक्षता म आज इहां ऊंखर निवास कार्यालय म आयोजित छत्तीसगढ़ खेल विकास प्राधिकरण के गवर्निंग बॉडी के बैठक म राजीव युवा मितान क्लब के उद्देश्य, गठन के स्वरूप, कार्ययोजना के क्रियान्वयन उपर परखर गोठ-बात करे गीस। राजीव युवा मितान क्लब मन के गठन ग्राम पंचायत स्तर म अऊ नगरीय निकाय मन म करे जाही।
मुख्यमंत्री ह बैठक म कहिन कि राजीव युवा मितान क्लब के माध्यम ले युवा मन म नेतृत्व क्षमता, कौशल विकास के गतिविधि संचालित करे जाही। राज्य शासन के विकास योजना मन अऊ सामाजिक कार्यक्रम मन म ये क्लब के युवा मन के भागीदारी ठउका करे जाही। क्लब के सदस्य मन ल खेल अउ सांस्कृतिक गतिविधि ले जोड़े जाही। जेखर से युवा शक्ति के उपयोग रचनात्मक काम मन म हो सकय।
खेल अउ युवा कल्याण विभाग के सचिव श्री सिद्धार्थ कोमल सिंह परदेशी ह बैठक म बताइस कि प्रदेश के 146 विकासखण्ड मन के 11 हजार 664 ग्राम पंचायत मन म राजीव युवा मितन क्लब योजना लागू करे जाही। एखर बर राज्य स्तर म मुख्यमंत्री श्री भूपेश बघेल के अध्यक्षता म राज्य स्तरीय समिति गठित करे जाही। जिला स्तर म प्रभारी मंत्री के अध्यक्षता म समिति गठित होही अऊ अनुभाग स्तर म अनुविभागीय अधिकारी (राजस्व) के मार्गदर्शन म ग्राम पंचायत स्तर म क्लब मन के गठन करके योजना के क्रियान्वयन करे जाही। क्लब के युवा मन ल कई सामाजिक गतिविधि जइसे-स्वच्छता, वृक्षारोपण कार्यक्रम मन ले जोड़े जाही।