- मुख्यमंत्री श्री बघेल ह क्लब के लोगो के करिस विमोचन
- युवा विकास गतिविधि मन बर क्लब ल हर महिना मिलही 10 हजार रूपिया
रायपुर, मुख्यमंत्री श्री भूपेश बघेल ह आज युवा महोत्सव के समापन समारोह म छत्तीसगढ़ के गांव-गांव म गठित होवइया राजीव युवा मितान क्लब के लोगो के विमोचन करिस। ये बेरा म उमन बताइस कि ये क्लब प्रदेश के हर गांव म गठित होही। क्लब ल युवा विकास के गतिविधि चलाय बर हर महीना 10 हजार रूपिया दिए जाही। मुख्यमंत्री ह युवा मन ले ये क्लब के सदस्यता लेहे के आव्हान करिन। हम आप ल बता देवन के समाज सुधारक, युगपुरूष अऊ महान दार्शनिक स्वामी विवेकानंद के जयंती 12 जनवरी ले आज 14 जनवरी तक तीन दिवसीय युवा महोत्सव के आयोजन करे गए रहिस। युवा महोत्सव म प्रदेशभर ले 7 हजार ले जादा युवा कला, संस्कृति, खेल म हिस्सा लेके अपन हुनर के प्रदर्शन करिन।
छत्तीसगढ़ विधानसभा के अध्यक्ष डॉ. चरणदास महंत ह समापन समारोह के अध्यक्षता करिन। ये बेरा म छत्तीसगढ़ विधानसभा के उपाध्यक्ष श्री मनोज मंडावी, खेल अउर युवा कल्याण मंत्री श्री उमेश पटेल, कृषि मंत्री श्री रविन्द्र चौबे, वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह, संस्कृति मंत्री श्री अमरजीत भगत, विधायक सर्वश्री मोहन मरकाम, धनेन्द्र साहू, शिशुपाल सोरी, श्रीमती अनिता योगेन्द्र शर्मा, नगर निगम रायपुर के महापौर श्री एजाज ढेबर, मुख्य सचिव श्री आर.पी. मण्डल, पुलिस महानिदेशक श्री डी.एम. अवस्थी, प्रधान मुख्य वन संरक्षक श्री राकेश चतुर्वेदी संग आन वरिष्ठ अधिकारी घलोक उपस्थित रहिन।