सेहत ऊपर जागरूकता लाए बर हॉफ मैराथन के होइस आयोजन

राजनांदगांव, आम मनखे मन म सेहत के प्रति जागरूकता लाए के उद्देश्य ले राजनांदगांव म काली भिनसरहा हॉफ मैराथन के आयोजन होइस। ये हॉफ मैराथन पद्मश्री गोविंदराम निर्मलकर ऑडिटोरियम परिसर ले भिनसरहा 6 बजे चालू होके शहर के कई ठन जगा मन ले होत वापस इही जगा खतम होइस। हॉफ मैराथन म धावक मन ह 5 किलोमीटर, 10 किलोमीटर अऊ 21 किलोमीटर के तीन अलग-अलग श्रेणी म दौड़ लगाईन। संभागायुक्त श्री दिलीप वासनीकर ह ये मा 5 किमी के दौड़ 35 मिनट म पूरा करिन। ये मा लइका- महिला मन संग सबो वर्ग के मनखे मन ह उत्साह ले भाग लीन। दूसर शहर मन ले घलोक धावक हॉफ मैराथन म हिस्सा लेहे पहुंचे रहिन। ए अवसर म आईजी दुर्ग श्री विवेकानंद सिन्हा ह मनखे मन ल स्वास्थ्य के प्रति जागरूक रहे बर प्रोत्साहित करिन। कलेक्टर श्री जय प्रकाश मौर्य ह कहिन कि मैराथन आयोजन ले मनखे स्वास्थ्य के प्रति सजग होही। हर मनखे बर बेहतर स्वास्थ्य, बेहतर पूंजी के समान होथे। स्वास्थ्य अच्छा रहिही त मन घलोक प्रसन्न रहिही। उमन मैराथन म भाग लेवइया धावक मन ल हार्दिक बधाई अउ शुभकामना दीन।
कमिश्नर दुर्ग संभाग श्री दिलीप वासनिकर, पुलिस महानिरीक्षक दुर्ग रेंज श्री विवेकानंद सिन्हा, कलेक्टर बालोद श्रीमती रानू साहू, पुलिस अधीक्षक राजनांदगांव श्री बीएस ध्रुव, नगर निगम राजनांदगांव के आयुक्त श्री चन्द्रकांत कौशिक संग अधिकारी-कर्मचरी मन अउ बड़ संख्या म शहरवासी मन ह मैराथन म हिस्सा लीन।