विश्व बास्केट बॉल क्रीड़ा प्रतियोगिता के आयोजन राजनांदगांव म होही- डॉ. प्रेमसाय सिंह

• राष्ट्रीय शालेय क्रीड़ा प्रतियोगिता के विजेता मन के सम्मान
• 781 खिलाड़ी मन ल एक करोड़ 21 लाख रूपिया के सम्मान राशि वितरित
• खेल प्रतियोगिता मन म छत्तीसगढ़ अपग्रेड होए हे

रायपुर, शिक्षा मंत्री ड़ॉ प्रेमसाह सिंह टेकाम ह आज राष्ट्रीय शालेय क्रीड़ा प्रतियोगिता 2017-18 के छत्तीसगढ़ राज्य के कई ठन खेल मन के 781 पदक विजेता खिलाड़ी मन के सम्मान करिन। रायपुर के कालीबाड़ी स्थित रवीन्द्र मंच म आयोजित सम्मान समारोह म स्कूल शिक्षा मंत्री ह खिलाड़ी मन ल एक करोड़ 20 लाख 88 हजार रूपिया के सम्मान राशि के चेक बांटिन।

एखर तहत स्वर्ण पदक पाए 283 खिलाड़ी मन ल 59 लाख 43 हजार रूपिया, रजत पदक पाए 233 खिलाड़ी मन ल 34 लाख 95 हजार रूपिया अऊ कांस्य पदक विजेता 265 खिलाड़ी मन ल 26 लाख 50 हजार रूपिया के चेक बांटिन। स्वर्ण पदक विजेता खिलाड़ी ल 21 हजार रूपिया, रजत पदक विजेता खिलाड़ी ल 15 हजार अऊ कांस्य पदक विजेता खिलाड़ी ल 10 हजार रूपिया के सम्मान राशि प्रदाय करे गीस।

डॉ. टेकाम ह बताइस कि छत्तीसगढ़ ल साल 2020 म विश्व बास्केट बॉल क्रीड़ा प्रतियोगिता आयोजित करे के अवसर प्राप्त होय हे। ये प्रतियोगिता राजनांदगांव म 20 ले 25 अपरेल के बीच म प्रस्तावित हे।

डॉ. टेकाम ह खिलाड़ी मन ल बधाई देवत ऊंखर उज्जवल भविष्य के कामना करिन। उमन बताइन कि सरकार कोति ले खेल प्रतिभा मन ल प्रोत्साहित करे बर स्कूल स्तर म बहुत अकन कदम उठाए गए हे। राज्य, राष्ट्रीय अऊ अंतर्राष्ट्रीय स्तर म पदक पवइया खिलाड़ी मन ल 10, 15 अउ 20 अंक के बोनस देहे जात हे। खिलाड़ी मन ल प्रोत्साहित करे हर साल राज्य स्तरीय शाला क्रीड़ा प्रतियोगिता म ऐथेलेटिक्स म पहिली, दूसर अउ तीसर स्थान पवइया खिलाड़ी मन ल 5 हजार रूपिया, 3 हजार रूपिया अऊ 2 हजार रूपिया के राशि दिये जाथे।

पूर्व मंत्री अउ विधायक श्री सत्यनारायण शर्मा ह कहिन कि शासन कोति ले राज्य स्तरीय शालेय क्रीड़ा प्रतियोगिता म हिस्सा लेवइया खिलाड़ी मन के दैनिक भत्ता 100 रूपिया ले बढ़ाके 150 रूपिया रोजेच प्रति छात्र करे गए हे। अइसनहे शालेय क्रीड़ा प्रतियोगिता म हिस्सा लेवइया खिलाड़ी मन के दैनिक भत्ता 125 रूपिया ले बढ़ाके 200 रूपिया रोजेच प्रति छात्र दे जावत हे। संचालक लोक शिक्षण श्री एस. प्रकाश ह बताइस कि साल 2016-17 म जिहां राष्ट्रीय खेल प्रतियोगिता म छत्तीसगढ़ के 11 वां स्थान रहिस, ओखर तुलना म साल 2017-18 अऊ 2018-19 म छत्तीसगढ़ के स्थान अपग्रेड होय हे। ये साल छत्‍तीसगढ़ ह 5 वां अउ 6 वां स्थान प्राप्त करे हे।