राजनांदगांव, 07 May 2024। फर्जी ऋण पुस्तिका बनाके दूसर के जमीन ल अपन बताके ठगइया आरोपी ल पुलिस ह गिरफ्तार करे हे। आरोपी ह जमीन के सौदा करके 20 लाख रुपिया के धोखाधड़ी करे हे। कोतवाली टीआई एमन साहू ह बताइस कि दीवानभेड़ी निवासी हेमशंकर चंद्राकर ह मामला के शिकायत दर्ज कराए हे। स्टेशन पारा म रहइया आरोपी प्रदीप कुमार उर्फ संजय घटोड़े ह फर्जी ऋण पुस्तिका देखा के गांधी नगर के जमीन ल अपन बताइस। जेन ल बेचे बर हेमशंकर ले 20 लाख रुपिया म सौदा तय करिस। सौदा के मुताबिक प्रार्थी ह ओला अलग-अलग माध्यम ले ओ राशि दीस। एखर बाद आरोपी रजिस्ट्री बर आनाकानी करे लगिस। पीड़ित ह जब अपन पइसा वापस मांगीस त आरोपी ह ओला तीन चेक दीस, जेन बाउंस हो गे। एखर बाद मामला के शिकायत थाना म दर्ज कराए गीस। पुलिस ह आरोपी प्रदीप उर्फ संजय ल गिरफ्तार करके धारा 420 के अंतर्गत कार्रवाई करे हे।
जमीन बेचे के नाम म 20 लाख के धोखाधड़ी, आरोपी गिरफ्तार
