कोरोना जांच अऊ इलाज अऊ रोकथाम बर सामाजिक संगठन करत हे प्रशासन के सहयोग

राजनांदगांव, 06 अक्‍टूबर 2020। प्रदेश म राज्य शासन कोति ले कोरोना के रोकथाम अऊ मरीज मन के इलाज बर सबो जरूरी सुविधा मुहैया कराए जात हे। कई सामाजिक संगठन ये काम म प्रशासन के खुद आगू आके सहयोग करत हें। इही कड़ी म राजनांदगांव जिला म जिला प्रशासन, स्वयंसेवी संस्था, सामाजिक संस्था अऊ मीडिया अऊ नागरिक मन के सहयोग ले ’एक युद्ध कोरोना के विरूद्ध’ अभियान म कोविड-19 के परीक्षण बर शहर के 51 वार्ड मन बर बनाय गे 41 कोविड-19 कोरोना टेस्ट केन्द्र मन म सैम्पल लेहे गए हे। कलेक्टर श्री टोपेश्वर वर्मा ह आज ’एक युद्ध कोरोना के विरूद्ध’ अभियान के तहत शहर के कोविड-19 कोरोना टेस्ट केन्द्र मन म व्यवस्था के अवलोकन करिन। उमन कहिन के सर्दी, खांसी अऊ बुखार के मरीज, बुजुर्ग अऊ गर्भवती महिला मन के सैम्पल जरूर लेवव। उमन कहिन के जेन परिवार म कोरोना पॉजिटिव मरीज मिले हे ओ परिवार के आन सदस्य मन के घलोक टेस्ट करावव अऊ अइसन मरीज जेमा सर्दी, खांसी, बुखार के लक्षण हे ओ मन ल तुरंते कोविड-19 हॉस्पिटल भेज देवव अऊ जिंकर म लक्षण नइ हे ओ मन ल कोविड-19 केयर सेंटर म रखव। उमन कहिन के एक संग जादा संख्या म मरीज आइसोलेशन म चले जाही त कोरोना संक्रमण म कमी आही।