किसान मन बर बैंकिंग सुविधा मन के विस्तार करव- कलेक्टर

राजनांदगांव, 17 जुलाई 2021। प्रशासक अऊ कलेक्टर श्री तारन प्रकाश सिन्हा ह पंद्रा तारीक के जिला सहकारी केन्द्रीय बैंक म खाद-बीज, धान उठाव अऊ फसल बीमा योजना के समीक्षा करिन। उमन कहिन कि किसान मन बर बैंकिंग सुविधा मन के विस्तार करव अऊ बैंक म ऊंखर बर अलग से काउंटर बढ़ावव, ताकि ओ मन ल परेशानी झन होवय। उमन कहिन कि जनसामान्य म बैंकिंग साक्षरता लाना हे। ताकि ओ मन चिटफंड कंपनी मन ले दूर रहयं अऊ ओ मन ल वित्तीय जानकारी रहय। कलेक्टर ह जिला म 1 लाख 63 हजार 380 किसान मन के फसल बीमा योजना म पंजीयन कराए बर सुव्यवस्थित तरीका ले काम करे म जिला सहकारी केन्द्रीय बैंक के काम ल सहराइन। जानबा हे कि कलेक्टर ह बैंकिंग सुविधा मन के बढ़ोत्तरी बर दूरस्थ क्षेत्र मानपुर अऊ मुढ़ीपार म भवन निर्माण के स्वीकृति देहे हें। बहुत दिन ले इहां भवन निर्माण बर जनप्रतिनिधि मन के मांग रहिस।
कलेक्टर श्री सिन्हा ह बांचे धान के उठाव लउहे करे के हुकुम डीएमओ अऊ सहायक खाद्य अधिकारी ल दीन। उमन धान के उठाव नइ करइया मिलर्स उपर कार्रवाई करे के निर्देश दीन। फसल बीमा योजना अऊ जिला म ऋण वितरण के जानकारी लीन। कलेक्टर ह सहकारी केन्द्रीय बैंक म आज तकनीकी कक्ष, ऋण कक्ष, फिल्ड कक्ष अऊ कोष के निरीक्षण करिन अऊ बैंक के गतिविधि मन के जानकारी लीन। उमन खाद गोदाम के घलोक निरीक्षण करिन। ये बेरा म डिप्टी कलेक्टर डॉ. दीप्ति वर्मा, जिला सहकारी केन्द्रीय बैंक के महाप्रबंधक श्री सुनील वर्मा, जिला विपणन अधिकारी श्री सौरभ भारद्वाज, सहायक खाद्य अधिकारी श्री भुनेश्वर चेलक, जिला सहकारी केन्द्रीय बैंक के अधिकारी अऊ कर्मचारी उपस्थित रहिन।