आदिम जाति अऊ अनुसूचित जाति के शासन ह रखत हे विशेष ध्यान

राजनांदगांव, 16 दिसम्बर 2020। आदिम जाति अऊ अनुसूचित जाति के विकास बर शासन कोति ले कई ठन योजना के तहत विशेष काम करे जात हे। जिला म आदिम जाति अऊ अनुसूचित जाति विकास विभाग कोति ले छात्रावास अऊ आश्रम मन म निवासरत छात्र-छात्रा मन बर शुद्ध पेयजल व्यवस्था करे बर 101 छात्रावास-आश्रम मन म पाछू दू बछर म आरो वाटर प्यूरीफायर प्लांट स्थापित करे गए हे। जेखर से छात्रावास-आश्रम मन म निवासरत पढ़ईया लईका मन ल शुद्ध जल पीए ल मिलत हे जऊन ऊंखर बर स्वास्थ्यवर्धक साबित होय हे। विभागीय छात्रावास-आश्रम मन म निवासरत पढ़ईया लईका मन बर कम्प्यूटर तको प्रदान करे गए हे। जेखर से विद्यार्थी मन कई ठन आनलाईन समाचार, कई प्रकार के नोट्स अऊ कम्प्यूटर संबधी ज्ञानवर्धक जानकारी प्राप्त करत हें। बालिका मन के सुरक्षा ल विशेष ध्यान रखत 51 कन्या छात्रावास अऊ आश्रम मन म सीसीटीवी कैमरा लगाए गए हे, ताकि कन्या छात्रावास अऊ आश्रम मन म अवईया-जवईया मनखे के जानकारी मिल सकय। एखर से अपराधिक तत्व मन के छात्रावास म दखल के जानकारी आसानी ले मिल सकही अऊ रोक लगही।
कलेक्टर श्री टोपेश्वर वर्मा के मार्गदर्शन म जिला म आदिम जाति अऊ अनुसूचित जाति विकास विभाग कोति ले कई ठन योजना मन के तहत काम करे जात हे। सहायक आयुक्त श्री एमएल देशलहरे ह बताइस के विभागीय 46 छात्रावास आश्रम मन म पढ़ईया लईका मन के ज्ञानवृद्धि बर स्मार्ट क्लास के निर्माण कराए गए हे। जेमां समय-समय म विद्यार्थी अपन जिज्ञासा के मुताबिक शिक्षक मन के सहयोग ले स्मार्ट क्लास के उपयोग करत हें जेखर से उमन ल विषयवस्तु ल समझे म आसानी होए हे। विशेष कोचिंग केन्द्र योजना के तहत विभागीय छात्रावास म आवासरत अइसे विद्यार्थी जऊन गणित, अंगरेजी, विज्ञान आदि कठिन विषय मन म कमजोर होथे, ऊंखर शैक्षणिक स्तर म सुधार बर विशेष कोचिंग के सुविधा उपलब्‍ध कराए के प्रावधान हे। विशेष कोचिंग 3 महिना (नवम्बर ले जनवरी तक) बर कराए जाथे। साल 2018-19 अऊ साल 2019-20 म विशेष कोचिंग योजनांतर्गत कुल 21 छात्रावास अऊ आश्रम के 998 पढ़ईया लईका मन ल लाभान्वित करे गए हे।