बजट पूर्व बैठक म छत्तीसगढ़ के मुख्यमंत्री ह केन्द्रीय योजना मन म केन्द्र के अंश बढ़ाए अऊ राज्य मन के अंश कम करे के मांग करिन
रायपुर, छत्तीसगढ़ के मुख्यमंत्री श्री भूपेश बघेल ह मांग करे हें कि केन्द्र प्रवर्तित योजना मन म केन्द्र के वित्तीय अंश बढ़ाये जाये अउ राज्य मन के वित्तीय अंश ल कम करे जाये। उमन कहिन कि केन्द्रीय योजना मन म राज्य मन के अंश ल सरलग बढ़ाये जात हे अऊ एखर से राज्य मन ल बिक्कट तकलीफ के सामना करना परत हे। श्री बघेल आज नई दिल्ली म केन्द्रीय वित मंत्रालय कोति ले आयोजित बजट पूर्व बैठक म बोलत रहिन। बैठक के अध्यक्षता केन्द्रीय वित्त मंत्री श्रीमती निर्मला सीतारमण ह करिन। बैठक म आन राज्य मन के मुख्यमंत्री अऊ वित्त मंत्री घलोक उपस्थित रहिन।
मुख्यमंत्री श्री बघेल ह सर्व शिक्षा अभियान, प्रधानमंत्री आवास योजना, एकीकृत बाल विकास योजना अऊ आन योजना मन के जिकर करत कहिन कि ए योजना मन के प्रभावी क्रियान्वयन बर केन्द्र सरकार ल अपन अंश के रूप म जादा राशि प्रदान करना चाही। बैठक म उमन 4 हजार 433 करोड़ के बस्तर प्लान के जिकर करत कहिन कि ए योजना के तहत अभी तक केवल 306 करोड़ रूपिया के राशि ही प्राप्त होए हे। उमन शेष राशि ल देहे के मांग करिन, ताकि बस्तर म प्रस्तावित अधोसंरचना विकास, स्वास्थ्य, शिक्षा, कृषि, सिंचाई, पेयजल अऊ स्वच्छता के काम करे जा सकय।
सौभाग्य योजना के जिकर करत मुख्यमंत्री ह कहिन कि योजना के मापदंड म छूट प्रदान करके 100 ले जादा जनसंख्या के प्रावधान ल शिथिल करके 50 ले जादा संख्या वाले मजरा-टोला ल घलोक निःशुल्क विद्युत कनेक्शन के लाभ देहे जाना चाही।
श्री बघेल ह प्रधानमंत्री किसान सम्मान निधि योजना म वन अधिकार मान्यता अधिनियम के अंतर्गत लाभान्वित परिवार मन ल घलोक ए योजना म सामिल करत उमन ल हर बछर 6 हजार के जगा म 12 हजार रूपिया के आर्थिक सहायता प्रदान करे के मांग करिन।
मुख्यमंत्री ह बताइन कि छत्तीसगढ़ ले देश म धान के सबले जादा समर्थन मूल्य रूपिया 25 सौ प्रति क्विंटल तय करत खरीफ 2018 सीजन म 80 लाख टन ले जादा धान क्रय करे गए हे। उमन राज्य म भारतीय खाद्य निगम कोति ले केन्द्रीय कोटा के अंतर्गत लेहे जाय वाले 24 लाख टन चावल के कोटा म वृद्वि करे जाय के अनुरोध करिन।
श्री बघेल ह बताइन कि छत्तीसगढ़ म सबो परिवार ल खाद्य सुरक्षा प्रदान करे बर फूड फार आल योजना के अंतर्गत अब 35 किलो चावल प्रति राशन कार्ड उपलब्ध कराए के व्यवस्था करे जात हे। उमन ए मद म होवइया व्यय के प्रतिपूर्ति बर केन्द्र सरकार ल प्रस्तुत करे जाय वाले दावा राशि के समय म अउ संपूर्ण राशि के एकमुश्त भुगतान करे जाय के अनुरोध करिन।
नरवा, गरूवा, घुरवा, बाड़ी योजना के जिकर करत मुख्यमंत्री श्री बघेल ह कहिन कि एखर बर मनरेगा, राष्ट्रीय कृषि विकास, राष्ट्रीय पशुधन विकास आदि के राशि के उपयोग करे जात हे। उमन ए योजना मन म राज्य ल जादा अनुदान राशि देहे जाय के मांग करिन। उमन अनुसूचित जनजाति अऊ अनुसूचित जाति वर्ग के कल्याण योजना मन बर घलोक जादा राशि देहे के मांग करिन।
श्री बघेल ह प्रधानमंत्री ग्राम सड़क योजना म देश म पहला स्थान पाय के जिकर करत कहिन कि पूरा हो गे सड़क मन के संधारण बर घलोक राज्य मन ल सहायता अनुदान देहे के आग्रह करिन। मुख्यमंत्री ह केन्द्र सहायित सबला योजना म करे गये बदलाव के जिकर करत कहिन कि एखर से एक अपरेल 2018 के बाद 15 ले 18 साल के शाला बाह्य बालिका मन ल योजना के लाभ ले वंचित कर दे गए हे।
मुख्यमंत्री ह रायपुर एयरपोर्ट म इंटरनेशनल कार्गो टर्मिनल चालू करे के अनुमति प्रदान करे अऊ औद्योगिक गतिविधि मन बर अन्तर्देशीय परिवहन अनुदान देहे के घलोक मांग करिन। उमन केन्द्रीय आदिवासी विश्वविद्यालय अमरकंटक के कैंपस ल बस्तर म चालू करे अऊ रायपुर म विश्वविद्यालय अनुदान आयोग के प्रादेशिक कार्यालय चालू करे के घलोक आग्रह करिन। बैठक म मुख्यमंत्री के प्रमुख सचिव श्री गौरव द्विवेदी घलोक उपस्थित रहिन ।
