राज्य योजना आयोग म रूरल इंडस्ट्रियल पार्क के सौंदर्यीकरण उपर कार्यशाला के आयोजन

रायपुर, छत्तीसगढ़ के अर्थव्यवस्था ल बढ़ाय म प्रदेश म बने गौठान अहम योगदान निभावत हे। एला अऊ बेहतर करे अऊ ग्रामीण व्यवसाय मन ल बढ़ावा देहे बर रूरल इंडस्ट्रियल पार्क के स्थापना करे जात हे। मुख्यमंत्री श्री भूपेश बघेल ह 300 रूरल इंडस्ट्रियल पार्क के शुरूआत करे हे। रूरल इंडस्ट्रियल पार्क ल ग्रामीण आर्थिक गतिविधि मन के माध्यम ले कइसे सशक्त बनावयं अऊ कइसे जादा ले जादा ग्रामीण एकर लाभ ले सकयं एखर बर नवा रायपुर स्थित राज्य योजना आयोग कार्यालय म आज एक कार्यशाला के आयोजन करे गीस। ये कार्यशाला म राज्य शासन कोति ले गठित कई ठन बोर्ड के अध्यक्ष अऊ प्रतिनिधि मन ल आमंत्रित करे गए रहिस।
रूरल इंडस्ट्रियल पार्क म आजीविका गुड़ी के माध्यम ले सबो वर्ग के व्यवसाय ल स्थान मिलही। ये खातिर रूरल इंडस्ट्रियल पार्क के सौंदर्यीकरण के संबंध म राज्य शासन कोति ले गठित कई ठन बोर्ड के अध्यक्ष अऊ प्रतिनिधि मन बर ये कार्यशाला विशेष रूप ले आयोजित करे गीस। ये कार्यशाला ल मुख्यमंत्री के सलाहकार श्री प्रदीप शर्मा के अध्यक्षता म आयोजित करे गए रहिस। श्री प्रदीप शर्मा ह बोर्ड के अध्यक्ष अऊ प्रतिनिधि मन ल गौठान मन म स्थित रूरल इंडस्ट्रियल पार्क के परखर जानकारी देवत ओ मन ल गौठान मन के संचालन के बारे म बताईन। एखर संगेच श्री शर्मा ह रूरल इंडस्ट्रियल पार्क म आगू के कार्ययोजना ल लेके घलोक जानकारी दीन अऊ कई ठन बोर्ड के अध्यक्ष व प्रतिनिधि मन ले अभी हाल काम मन अऊ नवा तकनीक ल लेके चर्चा करिन।
जानबा हे कि गौठान मन ल रूरल इंडस्ट्रियल पार्क के स्वरूप देहे जात हे जेखर से ग्रामीण उद्यमिता ल बढ़ावा मिलही अऊ प्रदेश आर्थिक सशक्तिकरण कोति अग्रसर होहीं। कार्यशाला म कई ठन बोर्ड के अध्यक्ष अऊ प्रतिनिधि मन के संग आजीविका मिशन के संचालक, रूरल इंडस्ट्रियल पार्क के नोडल अधिकारी अऊ ग्रामोद्योग विभाग के संचालक उपस्थित रहिन।