रायपुर, 04 फरवरी 2020। सामान्य प्रशासन विभाग कोति ले जारी आदेश के तहत सार्वजनिक कार्यक्रम मन म गायन बर राज्य गीत ‘अरपा पैरी के धार महानदी हे अपार‘ के मानकीकरण करत एखर अवधि एक मिनट 15 सेकण्ड करे गए हे। सामान्य प्रशासन विभाग कोति ले एखर पालन के संबंध म अध्यक्ष राजस्व मण्डल छत्तीसगढ़ बिलासपुर, जम्मो विभागाध्यक्ष, समस्त संभागायुक्त अऊ कलेक्टर ल हुकुम जारी करे हे।
हम आप ल बता देवन के राज्य शासन कोति ले डॉ. नरेन्द्र देव वर्मा के लिखे छत्तीसगढ़ी गीत ‘अरपा पैरी के धार, महानदी हे अपार‘ ल राज्य गीत घोषित करे गए हे। राज्य गीत के गायन सबो शासकीय कार्यक्रम मन म करे के हुकुम घलोक जारी करे गए हे। मंत्री परिषद म लेहे फेसला के मुताबिक सार्वजनिक कार्यक्रम मन म गायन बर राज्य गीत के मानकीकरण करे गए हे, जऊन जनसम्पर्क अउ सामान्य प्रशासन विभाग के वेबसाइट www.dprcg.gov.in अउ http://gad.cg.gov.in/notice_display.aspx म अपलोड करे गए हे।
मानकीकरण के बाद राज्य गीत अइसन हे –
‘‘अरपा पइरी के धार महानदी हे अपार,
इन्द्राबती ह पखारय तोर पइँया।
महूँ पाँव परँव तोर भुइँया,
जय हो जय हो छत्तिसगढ़ मइया।।
सोहय बिन्दिया सही घाते डोंगरी, पहार
चन्दा सुरूज बने तोर नयना,
सोनहा धाने के संग, लुगरा के हरियर रंग
तोर बोली जइसे सुघर मइना।
अँचरा तोरे डोलावय पुरवइया।।
(महूँ पाँव परँव तोर भुइँया, जय हो जय हो छत्तिसगढ़ मइया।।)
