रायपुर के ट्रैफिक व्यवस्था अउ हरियाली उपर राज्यपाल-वन मंत्री करिन गोठ-बात

रायपुर, राज्यपाल श्री रमेन डेका ले वन, जलवायु परिवर्तन, जल संसाधन अउ कौशल विकास मंत्री श्री केदार कश्यप ह राजभवन म सौजन्य भेंट करिन। ए बेरा म राजधानी रायपुर के ट्रैफिक व्यवस्था, पर्यावरण सुधार अउ जनसुविधा मन ल लेके परखर गोठ-बात होइस।
राज्यपाल ह रायपुर म बाढ़त यातायात दबाव ल ध्यान म रखत ट्रैफिक व्यवस्था म सुधार खातिर ठोस कदम उठाए उपर जोर दीन। उमन कहिन के राजधानी म बाहिर ले इलाज खातिर अवइया मरीज मन अऊ ऊंखर परिजन मन ल बेहतर परिवहन सुविधा उपलब्ध कराए जाना चाही, ताकि ओ मन ल कोनो प्रकार के परेशानी झन होवय।
पर्यावरण संरक्षण म बल देवत राज्यपाल ह निर्देश दीन के स्कूल, आश्रम अऊ शासकीय भवन मन के आसपास वृक्षारोपण ल प्राथमिकता देहे जाय। उमन कहिन के संस्थागत वन ल बढ़ावा देके हरित आवरण म बढ़ोतरी करे जा सकत हे, जेखर से शहर के पर्यावरण अऊ स्वच्छ अउ संतुलित बनही।
ए बेरा म वन मंत्री श्री केदार कश्यप ह राज्यपाल ल विभाग के कई ठन योजना अऊ चलत काम मन के जानकारी दीन। दुनों नेता मन ह मिलके राजधानी ल स्वच्छ, हरित अऊ सुगम यातायात वाला शहर बनाए खातिर साझा उदीम मन उपर सहमति व्यक्त करिन।