श्री हरिचंदन ले राजभवन म आई.आई.टी. गोवा के युवा मन ह करिन गोठबात
रायपुर, 10 दिसंबर 2023
राज्यपाल श्री विश्वभूषण हरिचंदन ले आज राजभवन म आई.आई.टी. गोवा ले आये पढ़ईया लईका मन ह गोठबात करिन। ये विद्यार्थी मन भारत सरकार के ‘‘एक भारत-श्रेष्ठ भारत‘‘ अभियान के ‘‘युवा संगम‘‘ कार्यक्रम के तहत पांच दिन के छत्तीसगढ़ प्रवास म हें।
प्रधानमंत्री श्री नरेंद्र मोदी के पहल म ये कार्यक्रम पूरा भारत म लागू करे गए हे। जेमां सबो प्रदेश के युवा आन-आन प्रदेश म जाके उहां के संस्कृति ल समझथें, खान-पान के जायका लेथें अऊ पर्यटन स्थल म घूमथें। ये कड़ी म गोवा के कई महाविद्यालय मन म पढ़त युवा छात्र-छात्रा मन ल छत्तीसगढ़ घुमाए जावत हे।
राज्यपाल श्री हरिचंदन ह पढ़ईया लईका मन ल संबोधित करत कहिन कि भारत के ताकत ओखर अनेकता म एकता के भावना हे। विविधता म एकता हमार देश के दुनिया म एक मिसाल हे। आने-आने संस्कृति, परंपरा के बाद घलव हम एके हन अऊ एक रहिबो। इही विचार धारा ल लेके भारत विश्व गुरू बने के दिशा म आगू बढ़त हे।
राज्यपाल श्री हरिचंदन ह कहिन कि एक भारत-श्रेष्ठ भारत के कार्यक्रम के दूरदर्शी ढांचा के तहत युवा संगम कार्यक्रम हमार राष्ट्र के विविध पहलु मन ल गहराई ले समझे अऊ ओ म गरब करे के एक अवसर हे। छत्तीसगढ़ यात्रा के समय पढ़ईया लईका मन ल इहां के समृद्धि संस्कृति, प्रगति अऊ इहां के विरासत के कई ठन पहलु मन ल जाने अऊ ओखर से सीखे के अवसर मिलही।