रइपुर, 27 अगस्त 2021 शुकवार। राज्यपाल सुश्री अनुसुईया उइके ले आज राजभवन म ‘एक भारत, श्रेष्ठ भारत कार्यक्रम’ के अंतर्गत गुजरात विधानसभा के अध्यक्ष श्री राजेन्द्र त्रिवेदी के नेतृत्व म विधानसभा के प्रतिनिधिमण्डल ह मुलाकात करीन। राज्यपाल ह छत्तीसगढ़ आए म उन्कर सुवागत करत कहीन कि छत्तीसगढ़ के लोगन अबड़े साहज अउ सीधवा हवयं। इहां के बोली अतेक मीठ हवय, जउन लउहे सबो लोगन आत्मसात कर लेथे। येह आदिवासी बहुल राज्य हरे, जेकर परंपरा मन अनूठा हवय। उन्कर बनाए कलाकृति मन जम्मो विश्व म प्रसिद्ध हे। छत्तीसगढ़ के प्राकृतिक सौंदर्य अद्भुत हवय। इहां विश्व प्रसिद्ध चित्रकोट जलप्रपात अउ आने पर्यटन स्थल हवय। राज्यपाल ह गुजरात विधानसभा के प्रतिनिधिमण्डल ले इहां के पर्यटन स्थल मन के भ्रमण करे के आग्रह तको करीन। विधानसभा अध्यक्ष श्री त्रिवेदी ह राज्यपाल ल गुजरात आए के नेवता दीन।
राज्यपाल ह जम्मो सदस्य मन के शाल अउ श्रीफल देके सुवागत करीन। गुजरात विधानसभा के अध्यक्ष श्री त्रिवेदी ह राज्यपाल सुश्री उइके ल शाल, प्रतीक चिन्ह स्टेच्यू ऑफ यूनिटी अउ पुस्तक देके सम्मानित करीन। प्रतिनिधिमण्डल म गुजरात विधानसभा के विधायकगण सर्वश्री श्री ब्रिजेश मेरजा, श्री जिग्नेश कुमार सेवक, श्री अश्विनभाई कोटवाल, श्रीमती जेनिबेन ठाकुर, डॉ. आशाबेन पटेल, श्रीमती निमिशाबेन सुथार, श्री बाबुभाई पटेल, श्री आनंदभाई चौधरी, श्री राकेशभाई शाह, श्री जगदीश विश्वकर्मा, सचिव श्री डी.एम. पटेल, श्री एन.एल. वानकर, श्री प्रवीण प्रजापति, श्री मनन दवे रिहिन। ये बेरा म छत्तीसगढ़ विधानसभा के प्रमुख सचिव श्री चन्द्रशेखर गंगराड़े, राज्यपाल के विधि सलाहकार श्री आर.के. अग्रवाल अउ उपसचिव श्री दीपक अग्रवाल तको रहिन।