बलरामपुर कलेक्टर ह राकेश प्रजापति ल दीस स्मार्ट फोन : राकेश बनिस दिव्यांग लइका मन बर प्रेरणा स्त्रोत

बलरामपुर, 06 अक्‍टूबर 2020। विकासखण्ड रामचन्द्रपुर के ग्राम नागरा निवासी राकेश प्रजापति दृष्टिहीन हे। राकेश अभी हाल म दिल्ली विश्वविद्यालय के वेंकेटश्वरा कालेज ले हिन्दी आनर्स के पढ़ाई करत हे। जिला प्रशासन ह राकेश प्रजापति ल कई ठन योजना मन के माध्यम ले सहयोग करके वोखर संघर्ष के सम्मान करे हे। राकेश के बताती वोखर प्रारंभिक शिक्षा-दिक्षा विशेष दिव्यांग स्कूल ले होए हे। एखर बाद उच्‍च शिक्षा बर वो दिल्ली गीस फेर दिल्ली म आर्थिक परेशानियां बाढ़े ले आगू के शिक्षा वोकर बर मुश्किल होवत रहिस तभे जिला प्रशासन ह मदद के हाथ बढ़ाइस। ओ ल 7 हजार रूपिया प्रतिमाह के राशि देहे गीस जेखर से वोखर घर संग आन जरूरत पूरा होए लागिस। कलेक्टर श्री श्याम धावड़े ह राकेश ले मुलाकात करके वोखर संघर्ष अऊ परिश्रम के बारे म जानकारी लीन। उमन राकेश ल एक स्मार्ट फोन देवत कहिन के जऊन दिव्यांग लइका आगू पढ़ाई करना चाहत हे राकेश वोखर बर प्रेरणा स्त्रोत हे। प्रशासन कोति ले दिव्यांग लइका मन बर कई ठन योजना संचालित हे जेखर लाभ ओ मन ल मिलही। जिला प्रशासन दिव्यांग लइका मन के हर संभव मदद बर तियार हे। कलेक्टर श्री श्याम धावड़े ह कहिन के दिव्यांग लइका मन म प्रतिभा के कमी नइ हे बस ओ मन ल अवसर प्रदान करे के जरूरत हे।