- मुख्यमंत्री श्री बघेल ह राज्यपाल सुश्री उइके के राखी मिले म कहिन: आप मन मोला मया, असीस अऊ राखी भेजके जऊन विश्वास व्यक्त करे हव, वो मोर बर अड़बड़ खुसी अऊ सम्मान के विषय ये
- मुख्यमंत्री ह बहिनी सुश्री उइके ल चिठ्ठी के संग उपहार म भेजिन लुगरा
रायपुर, 02 अगस्त 2020। मुख्यमंत्री श्री भूपेश बघेल ह राज्यपाल सुश्री अनुसुईया उइके कोति ले राखी परब म भेजे गए राखी मिले म प्रसन्नता व्यक्त करत कहिन के रक्षाबंधन अऊ भुजलिया परब के अवसर म आप मन मोला मया, असीस संग राखी भेजके जऊन विश्वास व्यक्त करे हव, वो मोर बर अड़बड़ खुसी अउ सम्मान के विसय हे। श्री बघेल ह बहिनी सुश्री उइके ल रक्षाबंधन पर्व के परंपरा मुताबिक भाई कोति ले शुभकामना के संग नगदी अऊ लुगरा उपहार म भेजे हें।
मुख्यमंत्री श्री बघेल ह बहिनी सुश्री उइके ल लिखे चिठ्ठी म लिखे हें के रक्षाबंधन के ये परब हमार पारिवारिक संबंध ल नवा ऊंचई म पहुंचाए के माध्यम बने हे। आप मन के संरक्षण मोर अऊ राज्य बर सौभाग्य के विसय हे। मुख्यमंत्री के रूप म अपन दायित्व मन के निर्वहन करे, कोरोना महामारी ले निपटे अऊ प्रदेश ल प्रगति के रस्ता म आगू ले जाय बर आप मन जऊन मोर उत्साहवर्धन करे हव, ओखर बर में सदैव आप मन के आभारी रइहुँ।
मुख्यमंत्री ह कहिन हे के ये पावन परब हमर महान संस्कृति के गरिमामय उत्कर्ष के चिनहा घलोक ये, जऊन बहिनी मन के प्रति भाई मन के संकल्प ल सुदृढ़ बनाथे। आप मन उत्तरदायित्व के प्रति सजग करत मोला जऊन शुभकामना भेजे हव, ओखर बर में कृतज्ञता व्यक्त करत हंव अउ आप मन ल विश्वास देवात हंव के आप मन के भावना के मुताबिक अपन जिम्मेदारी मन के निर्वाह पूरा निष्ठा अउ परिश्रम ले करहूँ।
