- छत्तीसगढ़ के कण कण म बसे हे भगवान राम
- मुख्यमंत्री ह सपरिवार कौशल्या माता मंदिर म पूजा अर्चना करके प्रदेश के सुख समृद्धि के कामना करिन
- छत्तीसगढ़ सरकार ह राम वन गमन पर्यटन परिपथ म प्रस्तावित 09 जगा के विकास बर बनाय हे 137.45 करोड़ के कान्सेप्ट प्लान
- चंदखुरी मंदिर के आगू बायपास सड़क के स्वीकृति: राष्ट्रीयकृत बैंक के शाखा घलोक खुलही
- पर्यटक मन के सुविधा बर स्थल म पेयजल, शौचालय, विद्युतीकरण, रेस्टोरेंट, पहुंच मार्ग बनाये जाही
- मुख्यमंत्री ह मंदिर परिसर म लगाइस बेल के पौधा
रायपुर, 29 जुलाई 2020। छत्तीसगढ़ म राजधानी रायपुर के तीर माता कौशल्या के जन्मभूमि चंदखुरी म लउहे भव्य मंदिर के निर्माण शुरू हो जाही। मुख्यमंत्री श्री भूपेश बघेल ह आज अपन धर्मपत्नी श्रीमती मुक्तेश्वरी बघेल अऊ परिवार के सदस्य मन के संग चंदखुरी पहुंचके उहां स्थित माता कौशल्या के प्राचीन मंदिर म पूजा-अर्चना करिन अऊ प्रदेश के खुशहाली अऊ समृद्धि के कामना करिन। उमन मंदिर के सौन्दर्यीकरण अऊ परिसर के विकास बर तियार परियोजना के विस्तृत जानकारी लीन। मुख्यमंत्री ह कहिन के मंदिर के सौन्दर्यीकरण के समय मंदिर के मूलस्वरूप ल यथावत रखत इहां अवइया श्रद्धालु मन के सुविधा मन के विशेष रूप ले ध्यान रखे जाय।
जानबा हे के छत्तीसगढ़ सरकार राम वन गमन रस्ता म परइया महत्वपूर्ण स्थल मन ल पर्यटन स्थल के रूप म विकसित करत हे। एखर शुरूआत चंदखुरी स्थित माता कौशल्या के मंदिर के सौंदर्यीकरण काम के बीते 22 दिसम्बर के भूमि-पूजन के संग कर देहे गए हे। भव्य मंदिर के निर्माण के कार्ययोजना म परिसर म विद्युतीकरण, तालाब के सौंदर्यीकरण, घाट निर्माण, पार्किंग, परिक्रमा रस्ता के विकास आदि काम सामिल करे गए हे।
मुख्यमंत्री श्री भूपेश बघेल ह कहिन के छत्तीसगढ़ भगवान राम के ननिहाल हे। इहां कण-कण म भगवान राम बसे हे। भगवान राम ह वनवास के बहुत अकन समय इहां व्यतीत करे हे। छत्तीसगढ़ सरकार भगवान राम के वन गमन मार्ग ल पर्यटन परिपथ के रूप म विकसित करत हे ताकि ए स्थल मन ल राष्ट्रीय अऊ अंतर्राष्ट्रीय स्तर म ख्याति मिल सकय। श्री बघेल ह कहिन के चंदखुरी म 15 करोड़ के लागत ले सौन्दर्यीकरण के काम कराए जाही। उमन ये बेरा म इहां तालाब के बीच ले होके गुजरइया पुल के मजबूती के संगेच इहां परिक्रमा पथ, सर्वसुविधायुक्त धर्मशाला अऊ शौचालय बनाए ल कहिन। मुख्यमंत्री ह कहिन के सौन्दर्यीकरण काम के भूमिपूजन हो गए हे इहां अगस्त के तीसर हफ्ता ले निर्माण काम चालू हो जाही।
मुख्यमंत्री ह ये बेरा म गांव वाले मन के मांग म मंदिर तीर ले बायपास सड़क के स्वीकृति प्रदान करत जरूरी कार्यवाही के निर्देश दीन। उहें ग्राम वासी मन के सहुलियत ल देखत चंदखुरी म राष्ट्रीयकृत बैंक के शाखा खोले के निर्देश जिला अधिकारी मन ल दीन। श्री बघेल ह ये बेरा म मंदिर परिसर म बेल अऊ उंखर धर्मपत्नी ह महुआ के पौधा घलोक रोपिन। एखर संगेच परिसर म आवंला, पीपल, अमरूद अऊ करंज आदि के पौधा घलोक लगाए गीस। मुख्यमंत्री ह ए पौधा मन म सेरीखेड़ी महिला समूह ले बांस ले बनाए जात ट्री-गार्डो ल लगवाइन। मुख्यमंत्री ह ये बेरा म ग्रामीणजन ले गौठान अऊ गोधन न्याय योजना संग गांव म उपलब्ध आन सुविधा मन के चर्चा करिन। ये बेरा म नगरीय प्रशासन मंत्री डॉ. शिव कुमार डहरिया, जनपद पंचायत आरंग के अध्यक्ष श्री खिलेश देवांगन, ग्राम पंचायत चंदखुरी के सरपंच श्रीमती मालती धीवर अऊ कौशल्या माता समिति के अध्यक्ष श्री देवेन्द्र वर्मा अऊ ग्रामीणजन उपस्थित रहिन।
जानबा हे के त्रेतायुगीन छत्तीसगढ़ के प्राचीन नाम दक्षिण कोसल अउ दण्डकारण्य के रूप म विख्यात रहिस। प्रभु श्रीराम ह उत्तर भारत ले छत्तीसगढ़ म प्रवेश के बाद कई ठन जगा मन म चौमासा व्यतीत करत दक्षिण भारत म प्रवेश करे रहिन। छत्तीसगढ़ म कोरिया जिला के गवाई नदी ले होके सीतामढ़ी हरचौका नाम के स्थान ले प्रभु श्रीराम ह छत्तीसगढ़ म प्रवेश करे रहिन। ये दौरान उमन 75 जगा के भ्रमण करत सुकमा जिला के रामाराम ले दक्षिण भारत म प्रवेश करे रहिन। ओ जगा मन म ले 51 स्थल अइसन हे, जिहां प्रभु श्रीराम ह भ्रमण के समय रूक के कुछ समय व्यतीत करे रहिन। पहिली चरण म एमां ले 9 स्थल मन ल विकसित करे जाही। छत्तीसगढ़ सरकार कोति ले राम वन गमन रस्ता के, पर्यटन के दृष्टि ले विकास के योजना मन उपर काम करे जात हे, जेखर उद्देश्य राज्य म अवइया पर्यटक अउ आगन्तुक मन के संगें-संग देश अऊ राज्य के मनखे मन ल घलोक राम वन गमन मार्ग अउ स्थल मन ले परिचित कराना अउ ए ऐतिहासिक स्थल मन के भ्रमण के समय पर्यटक मन ल उच्च स्तर के सुविधा घलोक उपलब्ध कराना हे।
छत्तीसगढ़ म राम वन गमन पर्यटन परिपथ ल विकसित करे के उद्देश्य ले पहिली चरण म 09 स्थल के चयन करे गए हे। ए स्थल मन म सीतामढ़ी-हरचौका (कोरिया), रामगढ़ (अम्बिकापुर), शिवरीनारायण (जांजगीर-चांपा), तुरतुरिया (बलौदाबाजार), चंदखुरी (रायपुर), राजिम (गरियाबंद), सिहावा-सप्तऋषि आश्रम (धमतरी), जगदलपुर (बस्तर), रामाराम (सुकमा) सामिल हे। राम वन गमन पर्यटन परिपथ म प्रस्तावित 09 स्थल मन ल लेत पर्यटन विभाग कोति ले एक कॉन्सेप्ट प्लान तियार करे गए हे, जेकर लागत 137.45 करोड़ रूपिया हे। राम वन गमन पर्यटन परिपथ बर राज्य शासन कोति ले पउर साल (2019-20) राशि 5 करोड़ रूपिया अऊ ये साल (2020-21) 10 करोड़ रूपिया के प्रावधान बजट म करे गए हे। ए हिसाब से कुल राशि रूपिया 15 करोड़ राज्य शासन कोति ले स्वीकृति देहे गए हे।
