रामचरितमानस के मरम ल जीवन म उतारे के जरूरत: कलेक्टर तारन प्रकाश सिन्हा

जांजगीर-चाम्पा, कलेक्टर श्री तारन प्रकाश सिन्हा ग्राम रसौटा म आयोजित मानस गायन प्रतियोगिता म सामिल होइन। ये बेरा म उमन कहिन कि छत्तीसगढ़ सरकार रामवनगमन रस्ता के विकास कर भगवान श्री राम के बताए मार्ग म चलत हे। सरकार कोति ले प्रदेश म मानस मंडली मन के पंजीयन के प्रक्रिया घलोक चालू करे गए हे।
कलेक्टर ह कहिन कि रामचरितमानस के चउपई मन ल जीवन म उतारबोन त लक्ष्य के पूर्ति के संग आध्यात्मिक शांति मिलथे। भगवान श्री राम ह 14 साल के वनवास काटे रहिन अऊ अहंकारी रावण के वध करे रहिन। उमन कहिन कि घमंड करइया के अंत जरूर होथे, ते पाए के जीवन म विनम्र अऊ शिष्टता रखना जरूरी हे। रामायण हमला बहुत कुछ सिखाथे। हमला रामचरितमानस के पाठ भर नहीं एखर मरम ल जीवन म उतारे के जरूरत हे। उमन ग्राम पंचायत स्तरीय मानस गायन प्रतियोगिता म भाग लेवईया मन ल प्रमाण पत्र घलोक बाटिन। ये बेरा म जिला पंचायत उपाध्यक्ष श्री राघवेन्द्र प्रताप सिंह अउ गांव के जनप्रतिनिधि उपस्थित रहिन।