रइपुर, 27 जून 2022
लइकामन ह मुख्यमंत्री ले पूछीन नानपन के सुरता
आदिवासी कन्या आश्रम म पढ़इया शालिनी ह मुख्यमंत्री ले सवाल करीन कि हमार रामगढ़ हेलीकॉप्टर ले कइसे दीखथे ? मुख्यमंत्री कहीन – गज्जब सुग्घर। मुख्यमंत्री के जुवाब म लइकामन जोरदार थपरी पीटके खुष होइन। आज भेंट मुलाकात के दौरान मुख्यमंत्री ह आदिवासी कन्या आश्रम के बालिका मन ले सऊँहत मिलके लइकामन के सवाल के जवाब दिस। दिव्या ह मुख्यमंत्री ल उँखर नानपन के सुरता सोरियाए बर कहीन। मुख्यमंत्री ह बताइन कि उँखर बचपन गांव म पहाए हवय, खेलकूद, दौड़ -भाग, गिल्ली -डंडा उन्कर प्रिय खेल रिहिस हवय। जब सांझ कन देरी ले घर जावन त उनला तको डांट परत रिहिस। कभू-कभू बरदीहा (चरवाहा) के संग चल देवत रिहिस, आए म डांट परत रिहिस। उन मन कहीन कि उनला माँ के हाथ ले बने गुलाब जामुन बहुत पसंद रिहिस। उन मन कहीन कि वो घर के लाडले रिहिस, उनला घर के सदस्य मन के भरपूर प्यार मिलीस।
इही बेरा वोमन कैरम खेलत डिंपल माझी अउ शारदा के हौसला अफजाई करीन अउ शाबासी दीन।
