पिकरीपार म तीन दिन के रामनामी बड़े भजन मेला के शुभारंभ
जांजगीर-चांपा, मुख्यमंत्री श्री भूपेश बघेल ह कहिन हे कि रामनामी मन के रोम रोम म राम बसथे। ओ मन श्री राम के सच्चा अनुयायी यें। उमन म राम के प्रति अटूट विश्वास अऊ श्रद्धा हे। छत्तीसगढ़ के गाव-कस्बा मन म तलाब खोदवई म रामनामी समाज के पुरखा मन के विशेष योगदान रहे हे। मुख्यमंत्री ह कहिन कि गांव-गांव म तालाब खोदई रामनामी मन के दया भाव के चिनहा ये। मुख्यमंत्री श्री बघेल आज जांजगीर-चांपा जिला के मालखरौदा विकासखण्ड के ग्राम पिकरीपार म रामनामी बड़े भजन मेला के शुभारंभ कार्यक्रम म सामिल होइन अऊ ये आयोजन बर सबो ल बधाई अऊ शुभकामना दीन। मेला के आयोजन अखिल भारतीय रामनामी सतनामी महासभा के तरफ ले म 06 ले 08 जनवरी तक करे जात हे।
मुख्यमंत्री ह कहिन कि राम सबो के अराध्य ये। छत्तीसगढ़ के संस्कृति म राम बसे हे। इहां के मनखे आपसी मुलाकात अऊ विदाई के समय राम-राम के उच्चारण करथें। उमन कहिन कि भगवान राम के माता कौशल्या के मायका छत्तीसगढ़ ये। भगवान राम ह वनगमन के अधिकांश समय छत्तीसगढ़ म बिताए हे। भगवान राम वनगमन के समय जऊन रद्दा म चलिन ओला राम वनगमन पर्यटन परिपथ के रूप म छत्तीसगढ़ सरकार कोति ले विकसित करे जात हे। एखर शुरूआत चन्दखुरी ले कर दिए गए हे। उमन कहिन कि छत्तीसगढ़ के सरकार पूरा संवेदनशीलता के संग छत्तीसगढ़ के सबो वर्ग के मनखे मन के सेवा अऊ ऊंखर विकास के काम करत हे। सबो किसान मन के ऋण माफी, 2500 रूपिया क्विंटल म धान खरीदी, जनजाति मन के अधिग्रहित जमीन के वापसी, वन अधिकार पट्टा के वितरण, हॉटबाजार क्लिनिक अऊ सुपोषण योजना के माध्यम ले नवा छत्तीसगढ़ के निर्माण करे जात हे। उमन सुराजी गांव योजना के विस्तार ले जानकारी देवत किसान मन ले गौठान मन म पशु मन के चारा बर पैरादान करे के अपील करिन अऊ गांव वाले मन ले गौठान के बेहतर संचालन करे के गिलौली घलोक करिन।
कार्यक्रम म मुख्यमंत्री श्री भूपेश बघेल के पहुंचे म रामनामी समाज कोति ले परंपरागत तरीका ले उंखर मोर मुकुट पहिरा के स्वागत करिन। मुख्यमंत्री ह जै स्तंभ म ध्वजारोहण करके मेला के शुभारंभ करिन। समारोह ल संस्कृति मंत्री श्री अमरजीत सिंह भगत, विधायक श्री राम कुमार यादव, रामनामी समाज के अध्यक्ष श्री राम प्यारे सतनामी ह घलोक संबोधित करिन। ये बेरा म सारंगगढ़ विधायक, रामनामी समाज के पदाधिकारी, अनुयायी संग कई समाज के मनखे उपस्थित रहिन।
