किसान, गरीब, पिछड़ा जाति मन संग सबो वर्ग बर कल्याणकारी बजट: श्री राम विचार नेताम

रायपुर, 09 फरवरी 2024। कृषि अऊ आदिम जाति विकास मंत्री श्री रामविचार नेताम ह आज छत्तीसगढ़ विधानसभा म वित्त मंत्री श्री ओ.पी. चौधरी कोति ले मुख्यमंत्री श्री विष्णु देव सरकार के प्रस्तुत बजट म अपन प्रतिक्रिया व्यक्त करत कहिन कि ये बजट प्रदेश के किसान, गरीब, अनुसूचित जाति-जनजाति, पिछड़ा वर्ग अउ अल्प संख्यक संग सबो वर्ग मन बर कल्याणकारी बजट हे। राज्य सरकार के मजबूत बजट प्रावधान अऊ कल्याणकारी नीति मन ले युवा, महिला अउ कमजोर वर्ग म समृद्धि अऊ आर्थिक सशक्तिकरण के दिशा म नवा रद्दा खुलही।
मंत्री श्री नेताम ह लउहे प्रतिक्रिया देवत कहिन कि छत्तीसगढ़ विधानसभा म आज वित्तीय साल 2024-25 बर 1 लाख 47 हजार 500 करोड़ रूपिया के बजट पेश करे गए हे, जेन पाछू साल के तुलना म 22 प्रतिशत जादा हे। ये सरकार के प्रदेश अऊ मनखे मन के विकास के दृढ़ इच्छा ल दर्शाथे। उमन कहिन कि हमर सरकार किसान, युवा, महिला मन संग गरीब अउ जरूरतमंद परिवार के विकास अऊ समृद्धि बर प्रतिबद्ध होके काम करत हे। उमन कहिन कि प्रस्तुत बजट म यशस्वी प्रधानमंत्री श्री नरेन्द्र मोदी के गारंटी मन ल घलोक पूरा करे के प्रावधान रखे गए हे। ये सरकार के मंशा अऊ नीति ल परिलक्षित करथे। मुख्यमंत्री श्री विष्णु देव साय के सरकार ह बस्तर अऊ सरगुजा के मनखे मन के सरलग विकास बर संकल्पित हे इहां के मनखे मन ल मल्टीसिटी शहर के जइसे एयर कनेक्टिविटी मिलय अऊ ईकों टूरिज्म डेस्टिनेशन के रूप म विकसित होवय ते पाए के घलोक बजट म प्रावधान करे गए हे। निश्चित ही एखर से आदिवासी अंचल के मनखे मन के विकास बर नवा रद्दा खुलही।
मंत्री श्री राम विचार नेताम ह कहिन कि भारतरत्न पूर्व प्रधानमंत्री श्री अटल बिहारी वाजपेयी के जन्म दिवस 25 दिसम्बर सुशासन दिवस के अवसर म संकल्प पत्र म करे गए वादा ल पूरा करत राज्य के 12 लाख ले जादा किसान मन ल 3 हजार 716 करोड़ रूपिया के बकाया धान बोनस के राशि के भूगतान करे के काम करे गीस। उहें राज्य सरकार अपन वादा ल पूरा करत किसान मन ले प्रति एकड़ 21 क्विंटल धान के खरीदी अऊ प्रति क्विंटल 3100 रूपिया के भाव ले धान खरीदके नवा कीर्तिमान बनाय हे। राज्य सरकार किसान मन ल समर्थन मूल्य के बाद अंतर के राशि प्रदान करे कृषक उन्नति योजना बर 10 हजार करोड़ रूपिया के बजट प्रावधान करे हे, जल्दीच किसान मन ल अंतर के राशि मिलही। एखर अलावा बजट प्रावधान म आदिवासी अंचल के तेंदूपत्ता संग्रहक मन के हित ल ध्यान म रखत प्रति मानक बोरा 4000 रूपिया ले बढ़ाके 5500 रूपिया कर दे गए हे। ये दूरस्थ आदिवासी अंचल के गरीब, महिला के हित म एक बड़ा कदम हे। संगेच प्रदेश के भूमिहीन खेतीहर मजदूर मनल दीनदयाल उपाध्याय भूमिहीन कृषि मजदूर योजना के संग 10 हजार रूपिया वार्षिक देहे के प्रावधान गरीब मन के विकास म सहायक सिद्ध होही।
मंत्री श्री नेताम ह कहिन कि हमर सरकार अनूसुचित जाति, जनजाति अऊ पिछड़े वर्ग अउ कमजोर वर्ग के लइका मन ल बने शिक्षा प्रदान करे बर आश्रम-छात्रावास संचालित करत हे। ए वर्ग के बच्चा जेन आर्थिक रूप ले कमजोर हे ओ मन ल संघ लोक सेवा आयोग, राज्य लोक सेवा आयोग, बैंक, रेलवे जइसे प्रतियोगी परीक्षा मन के तैयारी बर दिल्ली म स्थित 65 सीटर यूथ हॉस्टल ल 200 सीटर करे के प्रावधान ए वर्ग के लइका मन के विकास बर नवा रद्दा खोलेंही।
मंत्री श्री नेताम ह वित्त मंत्री कोति ले प्रस्तुत मुख्यमंत्री श्री विष्णु देव साय सरकार के बजट ल शत-प्रतिशत जनकल्याणकारी बताइस। उमन कहिन कि प्रस्तुत लगभग डेढ़ लाख करोड़ रूपिया के बजट प्रावधान अउ जनहितकारी नीति मन ले आगामी समय म विकासशील छत्तीसगढ़, विकसित छत्तीसगढ़ के दिशा म अग्रसर होही।