कसडोल, 12 सितंबर 2020। नक्सली मन के हाथ म मारे गए रेंजर रथराम पटेल के पार्थिव शरीर ल राजकीय सम्मान के संग गृह ग्राम कुम्हारी म अंतिम संस्कार करे गिन. एखर पहली रथराम के अंतिम दर्शन बर गांव म लोगन मन के हुजूम उमड़ पड़िस. ये दौरान वन विभाग के संसदीय सचिव चंद्रदेव राय समेत पीसीसीएफ अउ अधिकारी मन मौजूद रहिन.
बता देथन कि इंद्रावती टाइगर रिज़र्व भैरमगढ़ परिक्षेत्र म पदस्थ रथराम पटेल शुक्रवार मंझनिया मजदूरी भुगतान बर कोंडरोंजी गए रिहिस. इही दौरान नक्सली मन ह उंखर अपहरण कर लिस, फेर कोडरोंजी गांव के बीचों-बीच स्कूल के तिर धारदार हथियार ले शरीर म वार करके मउत के घाट उतार दे रिहिस. रेंजर रथराम मूल रूप ले बलौदाबाजार जिला के कसडोल विकासखंड अंतर्गत गांव कुम्हारी के रहइया रिहिस. वर्तमान म अपन परिवार के संग भैरमगढ़ म रहत रिहिन. रेंजर के हत्या के बाद वन विभाग के डाहर ले रेंजर रथराम पटेल के पार्थिव शरीर ल गृह ग्राम लाये गिस.
