रमेशर, जशोदा राशन कार्ड नवीनीकरण ले खुश
मुंगेली, प्रदेशव्यापी राशन कार्ड नवीनीकरण के काम मुंगेली जिला म घलोक चालू कर देहे गए हे। आज दूसर दिन राशन कार्ड नवीनीकरण बर मनखे मन के भीड़ उमडि़स। सार्वजनिक वितरण प्रणाली के तहत राशन कार्ड नवीनीकरण के काम 29 जुलाई तक चलही। ये अभियान के तहत जिला के सबो 350 ग्राम पंचायत अऊ तीन नगरीय निकाय मन के वार्ड मन म शिविर लगाये जात हे। विकासखण्ड मुंगेली के ग्राम पंचायत चकरभाठा के सचिव श्री चंद्रकुमार साहू ह बताइस कि 185 राशनकार्ड धारी मन ह आवेदन जमा करे हें। हितग्राही रमेशर, जशोदा, बेदीन, शांति अऊ मंदाकनी ले पूछे म बताइन कि राशन कार्ड नवीनीकरण काम ले उमन खुश हें। ग्राम पंचायत बैहाकापा म 31 हितग्राही मन कोति ले आवेदन पत्र जमा करे गीस।
ग्राम पंचायत म आवेदन पत्र जमा करे म कोनो प्रकार परेशानी नइ होवत हे। सहायक खाद्य अधिकारी श्री मिश्रा, खाद्य निरीक्षक, श्री किरंगे ह ग्राम पंचायत सुरदा, कंतेली संग आन पंचायत मन म राशन कार्ड नवीनीकरण बर चलत काम मन के निरीक्षण करिन। छत्तीसगढ़ सरकार कोति ले नवीनीकरण के प्रक्रिया के सरलीकरण करे गए हे। आवेदक ल केवल एक पन्ना म जरूरी जानकारी देना होही। आवेदन के संग मुखिया के दू फोटो, आधार कार्ड अऊ बैंक खाता के फोटोकापी लगाना होही। आवेदन पत्र अऊ राशनकार्ड दुनों उपभोक्ता मन ल निःशुल्क दे जाही। नवा राशनकार्ड जारी होत तक उनला जुन्ना कार्ड म ही राशन सामान मिलत रइही। नवा राशन कार्ड मिले म उनला जुन्ना राशन कार्ड ल जमा करना होही।
