मुख्यमंत्री अऊ शिक्षा मंत्री ह दीन बधाई अऊ शुभकामना
रायपुर, केरल के राजधानी तिरूवनन्तपुरम म आयोजित होवइया 27वां राष्ट्रीय बाल विज्ञान कांग्रेस 2019 म सुकमा जिला के चार लइका भाग लेहीं। मुख्यमंत्री श्री भूपेश बघेल अऊ स्कूल शिक्षा मंत्री डॉ. प्रेमसाय सिंह टेकाम ह भाग लेवईया लइका मन ल बधाई अऊ शुभकमाना दिए हें। हम आप ल बता देवन के सुकमा जिला के लइका मन कोति ले ‘जापानी इंसेफेलाइटिस ए मेजर प्रॉब्लम ऑफ छत्तीसगढ़ सुकमा‘ अऊ ‘कचरा ले समृद्धि‘ जइसे विसय म बनाए गए मॉडल के चयन राष्ट्रीय बाल विज्ञान कांग्रेस बर होए हे।
सुकमा जिला के ये चुने गए लइका मन केरल के तिरूवनन्तपुरम म 27 ले 31 दिसम्बर ल आयोजित होवइया राष्ट्रीय बाल विज्ञान कांग्रेस म छत्तीसगढ़ के प्रतिनिधित्व करहीं। ए लइका मन ल सुकमा जिला के कलेक्टर श्री चंदन कुमार ह घलोक सम्मानित करके उंखर उत्साहवर्धन करिन।
हालेच म रायपुर म आयोजित राज्य बाल विज्ञान कांग्रेस म सुकमा जिला के बाल वैज्ञानिक कुमारी श्रेया श्रीवास ह अपन शिक्षक श्री याबेश राजा के मार्गदर्शन म ‘जापानी इंसेफेलाइटिस ए मेजर प्रॉब्लम ऑफ छत्तीसगढ़ सुकमा‘ विसय म परियोजना के निर्माण करे रहिस, उहें कुमारी निशा नाग ह शिक्षक श्री नागेश दास के मार्गदर्शन म ‘कचरा ले समृद्धि‘ उप कथानक म ‘पूजन के बाद निकलइया जिनिस मन के उचित प्रबंधन करके नदी मन ल प्रदूषण मुक्त करना‘ परियोजना के प्रस्तुतीकरण करे रहिन।
हम आप ल बता देवन के राजधानी रायपुर म आयोजित राष्ट्रीय बाल विज्ञान कांग्रेस म कुल 123 परियोजना मन के मॉडल प्रस्तुत करे गीस। छत्तीसगढ़ राज्य ले राष्ट्रीय स्तर विज्ञान कांग्रेस म हिस्सा लेहे बर वरिष्ठ वर्ग म 10 परियोजना के चयन करे गीस। सुकमा जिला ले आईएमएसटी अंगरेजी माध्यम उच्चतर माध्यमिक विद्यालय सुकमा के छात्रा कुमारी श्रेया श्रीवास, सहयोगी कुमारी जयंती कुन्डु अऊ शासकीय उच्चतर माध्यमिक विद्यालय सुकमा के छात्रा कुमारी निशा नाग, सहयोगी कुमारी तनु कश्यप के चयन होए हे।
