छत्तीसगढ़ राज्य महिला आयोग के अध्यक्ष डॉ. किरणमयी नायक ह महिला बाल विकासं मंत्री ल सौंपिन प्रमाण पत्र
मुख्यमंत्री श्री बघेल अऊ महिला अऊ बाल विकास मंत्री श्रीमती भेंडि़या ह मैदानी अमला ल दीन बधाई
रायपुर, 03 फरवरी 2021। मुख्यमंत्री श्री भूपेश बघेल के निर्देशन म कोविड महामारी म छत्तीसगढ़ म होए काम के सराहना राष्ट्रीय स्तर म होवत हे। राष्ट्रीय महिला आयोग ह कोरोना काल म बढि़या काम बर छत्तीसगढ़ महिला अऊ बाल विकास विभाग के काम मन के सराहना करे हें। राष्ट्रीय महिला आयोग ह नई दिल्ली म छत्तीसगढ़ राज्य महिला आयोग के अध्यक्ष डॉ. किरणमयी नायक ल छत्तीसगढ़ म विभाग के मैदानी अमला के सराहनीय टीम वर्क बर प्रमाण पत्र प्रदान करे हे। रायपुर म आज डॉ. नायक ह महिला अऊ बाल विकास मंत्री श्रीमती अनिला भेंडि़या ल ये प्रमाण पत्र सौंपिन।
मुख्यमंत्री श्री बघेल अऊ मंत्री श्रीमती भेंडि़या ह आंगनबाड़ी कार्यकर्ता, सहायिका मन संग सबो मैदानी अमला ल प्रमाण-पत्र मिले म बधाई देहे हें। श्रीमती भेंडि़या ह कहिन कि मुख्यमंत्री श्री भूपेश बघेल के मार्गदर्शन म लॉकडॉउन म घलोक महिला अऊ बाल विकास विभाग ह एक्शन मोड म काम करे हे। आंगनबाड़ी बंद होए के स्थिति म आंगनबाड़ी कार्यकर्ता अऊ सहायिका बहिनी मन ह घर-घर जाके सूखा राशन अऊ रेडी-टू-ईट वितरण करिन अऊ मनखे मन ल कोरोना संक्रमण बर जागरूक करे हें। ये बेरा म घर मन म लइका मन के प्रांरभिक शिक्षा अऊ अभिभावक मन ल लइका मन के देखरेख के विसय म घलोक समझाए गीस। प्रदेश म कुपोषण मुक्ति के दिशा म जऊन प्रयास करे जात रहिस, ओला कोरोना काल म घलोक थमे नइ दे गीस एखर बर सबो बधाई के पात्र हें।
श्रीमती नायक ह बताइस कि राष्ट्रीय महिला आयोग कोति ले नई दिल्ली म आयोजित देश के सबो राज्य के महिला आयोग के अध्यक्ष मन के सम्मान समारोह म केन्द्रीय सूचना अऊ प्रसारण मंत्री श्री प्रकाश जावड़ेकर ह घलोक छत्तीसगढ़ राज्य महिला आयोग कोति ले महिला मन ल न्याय अऊ ऊंखर अधिकार के रक्षा बर करे गए काम मन के प्रसंशा करे हें। श्री जावड़ेकर ह कहिन कि जऊन प्रकार से छत्तीसगढ़ म महिला मन के सम्मान के रक्षा बर जल्दी कार्यवाही करे जात रहे हे, वइसनहे कोनो अऊ राज्य म परिलक्षित नइ होवत हे। समारोह म राष्ट्रीय महिला आयोग के अध्यक्ष श्रीमती रेखा शर्मा ह घलोक महिला मन के मामला म छत्तीसगढ़ सरकार ल सजग अऊ संवेदनशील बताइस।
डॉ. नायक ह बताइस के मुख्यमंत्री श्री भूपेश बघेल ह छत्तीसगढ़ म राज्य महिला आयोग ल बहुत जादा शक्ति प्रदान करे हे। मुख्यमंत्री के दिशा-निर्देश म ही पुलिस अऊ प्रशासन ले सहयोग लेके तीव्र गति ले महिला मन ल न्याय देवाए म आयोग तत्परता ले काम करत हे। छत्तीसगढ़ राज्य ह कोविड-लॉकडाउन के समय महिला मन ल न्याय देवाए बर अड़बड़ झन के जनसुनवाई करे हे। छत्तीसगढ़ महिला आयोग ह अब तक 5 महीना म 44 जनसुनवाई म 11 सौ प्रकरण मन के सुनवाई करे हे, जेमां करीबन 400 मामला मन के निराकरण करे गए हे। छत्तीसगढ़ म महिला आयोग के जनसुनवाई म सबो जिला मन के कलेक्टर, पुलिस अधीक्षक के सहयोग मिलत हे। महिला आयोग के निर्देश म कड़ाई ले पालन करे जात हे। छत्तीसगढ़ म महिला मन के शिकायत मन के निराकरण म जऊन प्रकार से पुलिस-प्रशासन तत्परता ले काम करत हे, वइसन पूरा देश म कहूं नइ होवत हे।