गोबर ले अब रतिराम के रोजेच होवत हे कमई

कांकेर, 31 जुलाई 2020। ग्रामीण अर्थव्यवस्था ल मजबूती प्रदान करे बर छत्तीसगढ़ शासन ह ‘‘गोधन न्याय योजना’’ के शुरूआत करे हे, जऊन गांव वाले मन बर आजीविका के साधन बन गए हे। कांकेर जिला के भानुप्रतापपुर विकासखण्ड के ग्राम मुंगवाल के रति राम कुमेटी तीर एको पालतू मवेशी नइ हे, तभो ले ओ ह 70 ले 80 किलो गोबर के विक्रय रोजेच गौठान म करत हे। कांकेर जिला के प्रभारी सचिव श्री धनंजय देवांगन अऊ कलेक्टर श्री के.एल. चौहान मुंगवाल के गौठान के आकस्मिक निरीक्षण करे पहुंचिन। ओ समे रति राम कुमेटी ह 86 किलो गोबर के विक्रय गौठान समिति ल करत रहिस। वोकर मेर पूछे म वो ह बताइस के वोकर घर म एको मवेशी नइ हे, फेर खेती किसानी ले फुर्सत पाके वो ह संझा-बिहनिया घूम-घूमके गोबर सइंतथे अऊ ओला गौठान समिति ल बेचथे। रति राम के बताती वो ह हर रोज करीबन 70 ले 80 किलो गोबर के विक्रय गौठान समिति ल करत हे। जिला के प्रभारी सचिव श्री देवांगन अऊ कलेक्टर श्री चौहान ह ये बात उपर प्रसन्नता व्यक्त करत वोखर ये काम के सराहना करिन। रति राम ह बताइस के वोकर तीन एकड़ के खेती हे जेमां धान के फसल लगे हे फेर पशुधन नइ हे।

जानबा हे के शासन ह हरेली तिहार 20 जुलाई के दिन ‘‘गोधन न्याय योजना‘’ चालू करे हे, जेखर तहत् कांकेर जिला के 197 गौठान मन म घलोक गोबर ल 02 रूपिया प्रति किलो के दर ले बिसाए जात हे, जेला वर्मी कम्पोस्ट बनाके विक्रय करे जाही। ये व्यवस्था ले गांव वाले मन संग महिला अऊ बेरोजगार युवा मन ल रोजगार के अवसर प्राप्त होवत हे।